Os cinco membros da Manda condenados por abusar sexualmente dunha moza madrileña nos Sanfermíns de 2016 seguirán por videoconferencia, desde o cárcere, a vista do próximo luns na que se decidirá sobre a prórroga da súa prisión provisional ou a súa posta en liberdade.
O próximo 7 de xullo, explicaron a Efe fontes do TSJN, vence o prazo máximo de dous anos para a prisión provisional, polo que debe celebrarse unha vista para decidir se se prorroga o encarceramento ou, pola contra, se atenden as peticións dos avogados dos mozos condenados para a súa posta en liberdade.
A prisión provisional, en todo caso, pode prolongarse como máximo ata a metade da condena imposta, 9 anos de cárcere para os membros da Manda, polo que se podería prorrogar por outros dous anos e medio. Na vista do luns, presidida polos maxistrados da Sección Segunda da Audiencia Provincial de Navarra que emitiron a sentenza, estarán presentes así mesmo a fiscal e os avogados de todas as partes.
Para tomar a súa decisión, que deberá coñecerse antes do próximo 7 de xullo, os maxistrados terán en conta o risco de fuga dos condenados, de destrución de probas ou de reiteración delituosa. Se se concedese a posta en liberdade, a mesma faríase efectiva de xeito case inmediato, o mesmo día da publicación do auto ou ao día seguinte.
A conselleira de Relacións Institucionais do Goberno de Navarra, Ana Ollo, asegurou este xoves en conferencia de prensa que o Executivo Foral presentou unha alegación en contra da posta en liberdade dos condenados. Ollo, que presentou o "Informe anual do terceiro acordo para a coordinación ante a violencia contra as mulleres", declarou que, se ademais se pide o achegamento dos mozos a cárceres próximos aos seus lugares de orixe, valorarase esa posibilidade, tamén por parte dos servizos xurídicos do Goberno.
Tamén presentou alegacións para desestimar a petición de liberdade provisional o Concello de Pamplona, que rexistrou cinco escritos, un por cada condenado, insistindo no risco de fuga e a importancia das condenas impostas na sentenza.
As alegacións, informou o Concello nun comunicado, sinalan que as condenas a 9 anos de prisión supoñen "penas de evidente importancia e que poden verse substancialmente incrementadas á vista dos recursos de apelación interpostos polo Ministerio Fiscal e as acusacións".
Os escritos destacan que o risco de fuga viuse incrementado pola sentenza, xa que actualmente "xa non nos atopamos ante unha expectativa ou posibilidade máis ou menos previsible de condena, senón ante a evidencia que supoñen os feitos declarados probados".
Indícase, ademais, que os condenados se atopan incursos noutra causa pola posible comisión dos delitos de abuso sexual e contra a intimidade das persoas "o que non fai senón ensombrecer aínda máis o seu futuro, ante o que pode darse a máis que probable tentación de subtraerse á acción da xustiza".
