O ministro do Interior en funcións, Fernando Grande-Marlaska, esixiu ao presidente da Generalitat, Quim Torra, que condene a violencia ocorrida estes días en Cataluña "de xeito firme, rotunda, sen matices, sen adxectivos nin medias tintas, sen equidistancias".
Así o manifestou este domingo Grande-Marlaska na rolda de prensa posterior ao Comité de seguimento da situación en Cataluña, que estivo presidida polo presidente do Goberno en funcións, Pedro Sánchez, e na que tamén participou a vicepresidenta do Goberno en funcións, Carmen Calvo.
Neste sentido, o ministro destacou que "ninguén pode nin debe ser ambiguo fronte ás accións violentas" e que o presidente do Goberno en funcións foi "moi contundente". "Espera unha condena efectiva, directa, de Torra e do Goberno catalán respecto da violencia e a súa solidariedade coas Forzas e Corpos de Seguridade do Estado", precisou.
Así mesmo, fixo fincapé en que Sánchez foi "moi concluínte" e pediu a Torra que fale cos cataláns "de convivencia" porque, ao seu xuízo, "ten unha débeda" co conxunto dos cataláns.
O ministro asegurou que os disturbios en Cataluña son "un problema estritamente de orde pública". "Para erradicar o problema de orde pública en Cataluña, hai que actuar especificamente contra os violentos", subliñou.
Para erradicar o problema "de orde pública", pediu a todas as forzas políticas que se desmarquen da violencia" porque, na súa opinión, a unidade dos demócratas "é imprescindible", así como continuar co recoñecemento ao "magnífico" labor das Forzas e Corpos de Seguridade do Estado e o "gran traballo" de colaboración que están a levar a cabo.
NOVA CHAMADA DE TORRA A SÁNCHEZ. Respecto da nova chamada de Torra a Sánchez este domingo, Marlaska insistiu en que o presidente de Executivo en funcións foi "moi concluínte" ao esperar unha condena "directa" da violencia por parte presidente da Generalitat.
Aínda que os disturbios "van a menos", o ministro resaltou que o Goberno segue "avanzando" no seu plan de "anulalos" e asegurou que a resposta do Estado é, igual que noutras democracias, "de orde pública". Así, destacou a "lexítima" actuación das Forzas e Corpos de Seguridade "para neutralizar a violencia".
"O Estado actúa, seguimos detendo a quen leva a cabo feitos violentos. Temos un marco normativo amplo para as circunstancias segundo se vaian derivando os acontecementos", manifestou.
Para rematar, Marlaska negou que as Forzas e Corpos de Seguridade do Estado teñan falta de medios e de recursos para afrontar as protestas en Cataluña. "Falei cos axentes, con todos os corpos, e nunca me trasladaron problemas. Foron os medios suficientes, os necesarios", concluíu.