Màxim Huerta, o ministro máis breve da democracia

O ata este mércores ministro de Cultura e Deporte, Màxim Huerta, converteuse na persoa que menos tempo estivo á fronte dunha responsabilidade ministerial en España na etapa democrática, xa que só permaneceu no cargo unha semana.

Huerta, xunto ao resto de membros do gabinete de Pedro Sánchez, xurou o seu cargo ante o Rei o pasado xoves 7 de xuño e ese mesmo día tomou posesión. Menos dunha semana despois presentou a súa renuncia.

El Confidencial publicaba este mércores que o xa exministro foi sancionado por Hacienda por defraudar máis de 200.000 euros ao fisco entre 2006 e 2008 a través da empresa que creara para facturar os seus traballos como presentador de televisión.

Despois destes sete días no Goberno, Huerta pasa a encabezar a lista de ministros con mandatos máis breves da democracia, na que recentemente pasou a ocupar un lugar destacado o último titular de Economía, Industria e Competitividade, Román Escolano.

Escolano permaneceu 91 días no cargo, xa que tomou posesión o 8 de marzo deste ano en substitución de Luis de Guindos e foi substituído por Nadia Calviño, tras o éxito da moción de censura de Pedro Sánchez, o 7 de xuño.

Desde as primeiras eleccións democráticas estes son os ministros que permaneceron menos tempo no cargo:

- Màxim Huerta, ministro de Cultura e Deporte no Goberno do PSOE. 2018. (7 días).

- José Luís García Ferrero, ministro de Agricultura no último Goberno da UCD. 1982. (81 días).

- Román Escolano, ministro de Economía, Industria e Competitividade no Goberno do PP. 2018. (91 días).

- Antoni Asunción, ministro do Interior con Felipe González. 1993-94 (158 días).

- Félix Manuel Pérez Miyares, ministro de Traballo no último Goberno de Adolfo Suárez. 1980-81. (171 días).

- Eduardo Punset, ministro de Relacións coas Comunidades Europeas. 1980-81. (171 días).

- Julia García Valdecasas, ministra de Administracións Públicas e Política Territorial con José María Aznar. 2003-04.(229 días).

- Enrique Fuentes Quintana, vicepresidente e ministro de Economía no primeiro Goberno da UCD. 1977-78.(235 días).

- Ricardo de la Cierva, ministro de Cultura da UCD con Adolfo Suárez. 1980. (235 días).