A chanceler alemá, Angela Merkel, e o presidente francés, Emmanuel Macron, asinaron este martes o chamado Tratado de Aquisgrán, complementario ao do Elíseo de 1963, destinado a dar un novo impulso tanto ás relacións bilaterais como da Unión Europea (UE).
Ambos os líderes subscribiron o documento na sala da coroación do Concello desa cidade alemá, xunto ás fronteiras con Holanda e Bélxica. "Co Tratado de Aquisgrán renovamos o fundamento da cooperación entre os nosos dous países", dixo Merkel durante a cerimonia.
Merkel resaltou despois que, en vista dun pasado de guerras entre Francia e Alemaña, a relación actual é algo que non pode darse por sobreentendido e que foi o froito dun traballo que comezou tras a II Guerra Mundial.
O novo tratado, segundo a chanceler, responde á necesidade de facer fronte aos tempos actuais, marcados pola ameaza dos populismos e os nacionalismos e polo que representa o Brexit, a saída do Reino Unido do bloque comunitario, para a Unión. "Por primeira vez un estado membro vai deixar a UE", dixo Merkel.
Macron, pola súa banda, cualificou o tratado de "indispensable" e dixo que con el Alemaña e Francia "abren un novo capítulo". "Damos un novo paso a partir do fudamento da reconciliación", agregou. Ademais, o presidente francés, referiuse á saída do Reino Unido da UE como o "Brexit doloroso" e recordou os "grandes cambios" que afrontan os europeos no ámbito internacional.
Entre eles citou o cambio climático, o terrorismo ou o desafío da inmigración. "Neste mundo, Alemaña e Francia deben asumir a súa responsabilidade e mostrar o camiño", dixo Macron, que agregou que ambos os Estados deben mostrar "como as nacións adultas viven en paz". "A ameaza hoxe non vén dos veciños, senón do exterior de Europa e do interior da nosa sociedade", continuou o presidente francés.
E alertou do reto que supón "responder ao enfado" dos cidadáns europeos, para o que chamou a unha "nova solidariedade" para poder asumir "esa responsabilidade cara a Europa". "Os nosos cidadáns piden unha resposta cada vez máis forte", sinalou Macron.
Tanto Merkel como Macron resaltaron o "carácter simbólico" de Aquisgrán, a vella capital do imperio carolinxio que reflicte tanto as similitudes da historia dos dous países como os distintos camiños que seguiron. á cerimonia asistiron o presidente da Comisión Europea, Jean-Claude Juncker; o do Consello Europeo, Donald Tusk, e o de Romanía, Klaus Johannis, país que exerce a presidencia de quenda comunitaria.
O acto considérase de gran relevancia para o motor franco-alemán e para o conxunto do bloque europeo, por coincidir co momento de incerteza respecto ao Brexit e ante as eleccións europeas do próximo maio, cruciais para a UE.
O novo tratado céntrase en apartados tales como a seguridade, a cooperación económica, a investigación ou tecnoloxía e incluirá así mesmo cuestións de política exterior, educación, cultura, cambio climático e medio ambiente e sociedade civil. Á cerimonia da firma do documento e discursos de Merkel, Macron, Juncker, Tusk e Johannis seguirá un debate entre os líderes francés e alemá con cidadáns, na aula Carolina do mesmo concello de Aquisgrán.
