O doutor Liu Zhiming, director do Hospital Wuchang da cidade chinesa de Wuhan —epicentro da epidemia do novo coronavirus— faleceu este martes como consecuencia do virus, segundo informou o estatal Diario do Pobo. Liu, neurocirurxán de 50 anos, é o primeiro director dun hospital que morreu pola enfermidade, segundo detallou o rotativo.
O hospital que dirixía o doutor Liu é un dos centros médicos especificamente designados para a atención a pacientes de Covid-19 en Wuhan, capital da provincia de Hubei, e que permanece en corentena desde o pasado 23 de xaneiro.
Ao redor de 2.000 traballadores sanitarios chineses resultaron infectados polo coronavirus, e varios deles faleceron, entre eles o doutor Li Wenliang, un médico que tratou de alertar os seus compañeiros sobre un posible nova enfermidade e foi reprendido por difundir "rumores" por parte das autoridades.
O Covid-19 provocou ata agora polo menos 1.873 mortes en todo o mundo, das que 1.868 foron certificadas na China continental, onde se rexistraron 72.436 contaxios (en torno ao 99% dos casos mundiais).
Os síntomas da nova enfermidade son en moitos casos parecidos aos dun arrefriado, pero poden vir acompañados de febre e fatiga, tose seca e disnea (dificultade para respirar).
