O que foi presidente de Francia entre 1995 e 2007, o conservador Jacques Chirac, morreu este xoves aos 86 anos, anunciou a súa familia. A súa saúde deteriorouse desde a súa saída do Elíseo, a causa sobre todo dun accidente vascular cerebral que sufriu en 2005, durante o seu segundo mandato.
En setembro de 2016 tivo que volver a Francia con carácter urxente desde Marrocos, onde estaba de vacacións, para ser hospitalizado por unha infección pulmonar. A súa última aparición nun acto oficial remonta a novembro de 2014.
Nunha das primeiras reaccións de responsables das altas institucións do Estado, o presidente da Asemblea Nacional, Richard Ferrand, dixo que Chirac "forma parte da historia de Francia".
O antigo presidente francés naceu en París o 29 de novembro de 1932, estudou no Instituto de Estudos Políticos (Sciences Po) e na súa mocidade estivo vinculado aos socialistas e os comunistas, pero pronto derivou cara á dereita e durante décadas foi un dos seus principais líderes.
Antes de chegar á xefatura do Estado, foi dúas veces primeiro ministro, varias veces ministro e tamén alcalde de París.
