Dúas persoas morreron e 27 resultaron feridas o descarrilamento este xoves dun tren de alta velocidade que percorría o traxecto Milano-Salerno (norte de Italia), informou a Protección civil italiana. Segundo esta fonte, os falecidos son os dous maquinistas do convoi, que descarrilou preto da cidade de Casal Pusterlengo, na provincia de Lodi, por causas que aínda se descoñecen ás 5.30 hora italiana (4.30 GMT).
Os 27 feridos, todo eles de carácter leve, foron trasladados aos hospitais da zona para un recoñecemento médico e sufriron na súa maioría contusións, mentres que un dos pasaxeiros presenta unha perna rota, informou Protección civil.
O tren ía practicamente baleiro e os feridos non presentan lesións graves
O tren saíra da estación central de Milán poucos minutos antes e só levaba a 27 pasaxeiros debido ao temperán horario, informou a sociedade de Ferrocarrís do Estado. Segundo as primeiras imaxes, a locomotora saíuse das vías e continuou ata impactar cunha casa de campo deshabitada, mentres que envorcou o segundo vagón do tren, modelo Frecciarossa 9595.
O delegado de Goberno de Lodi, Marcello Cardona, que se achegou á zona do accidente afirmou que podíase ter producido unha auténtica "masacre", xa que o tren aínda non tomara a súa maior velocidade e ía practicamente baleiro.
Mentres que se realizan as primeiras investigacións, os medios italianos apuntan que neste tramo estaban a realizarse obras de mantemento por parte da sociedade Ferrocarrís do Estado.
Ferrocarrís do Estado informou de que se desviaron todos os trens que pasaban por esa vía e xa que logo produciranse atrasos de ata unha hora e numerosas cancelacións. A ministra de Infraestruturas e Transporte, Paola De Micheli, anunciou que está a viaxar á zona do accidente.
