Os mossos d'esquadra efectuaron unha nova carga na T1 do aeroporto de Barcelona contra parte dos manifestantes congregados para protestar pola sentenza do "procés" e chegaron a disparar proxectís de foam (espuma).
A actuación policial tivo lugar esta tarde na planta 0 do aeroporto, na zona do aparcadoiro de taxis, fronte á porta de Chegadas, segundo explicaron fontes policiais.
Os mossos interviñeron ante a presión sobre a liña policial que, segundo este corpo, exerceron algúns dos concentrados e ante o risco de que puidesen acceder pola forza ao interior das instalacións aeroportuarias.
Ante esta situación, os axentes da policía autonómica realizaron algunha carga e dispararon estes proxectís, unha das ferramentas utilizadas en substitución das pelotas de goma, segundo se aprecia nalgúns vídeos divulgados por organizacións independentistas como Arran, así como polo colecitvo Iridia, centro de defensa dos dereitos humanos.
De feito, Iridia tamén denunciou que, durante as cargas, os mossos golpearon aos manifestantes coas súas porras por encima da cintura. Segundo a policía autonómica, a actuación permitiu "gañar espazo e seguridade" nesta zona do aeroporto, onde se concentraron miles de persoas para protestar pola sentenza do "procés".
A primeira hora da tarde, efectivos da policía autonómica realizaron xa unha primeira carga contra un grupo de manifestantes no acceso da estación do metro do aeroporto do Prat, actuación que acabou cun detido.
Por outra banda, axentes da Policía Nacional identificaron a varias persoas neste vestíbulo do metro, aínda que non levaron a cabo ningunha detención.
