Unha peruana de 33 anos faleceu este martes na Estación central de Sants de Barcelona ao rebentar algún dos envoltorios da droga que transportaba no seu estómago, segundo a autopsia que lle practicaron.
Fontes dos Mossos d'Esquadra explicaron a Efe que, unha vez a autopsia confirmou que a causa da morte foi a droga que transportaba dentro, intentan pescudar de onde procedía e onde se dirixía a vítima.
Os Mossos d'Esquadra abriron a investigación pola morte da muller na mañá do martes, cando apareceu inconsciente na Estación de Sants de Barcelona. Segundo os corpos de seguridade, un vixiante de Renfe avisoulles sobre as 09:30 horas de que atopara a unha muller inconsciente.
Unha dotación dos Mossos que acudiu ao lugar intentou facerlle manobras de reanimación, sen resultado, ata que chegaron catro dotacións do Sistema Médico de Urxencias (Sem), que tampouco puideron facer nada por salvar a súa vida.
Os sanitarios pensaran inicialmente que se trataba dunha muller que podía estar embarazada xa que notaron que tiña o abdome inflado, pero non foi ata a realización da autopsia cando se confirmou que a muller era unha mula, denominación que se emprega para as persoas que transportan droga inxerida.
