O Open Arms xa pode entrar en augas italianas sen a ameaza de ser retido nin de pagar multas millonarias tras quedar cancelada por un tribunal administrativo de Lazio a prohibición asinada polo ministro do Interior Matteo Salvini que non permitía a este buque entrar ás súas augas territoriais.
Así o anunciou este mércores en Madrid o fundador da ONG catalá, Óscar Camps, tras reunirse co embaixador alemán, a quen pediu que medie co Goberno español para atopar unha solución permanente aos rescates no Mediterráneo.
Camps tamén avanzou que pedirá a evacuación inmediata "por motivos médicos" dos 147 inmigrantes que aínda permanecen abordo do buque, aínda que non o fará "sen obter antes a autorización previa das autoridades italianas ou maltesas, os países nos que se atopan os portos seguros máis próximos".
"Buscamos a legalidade absoluta", resaltou Camps, quen anunciou que ante o empeoramento das condicións meteorolóxicas van buscar xa abrigo na illa italiana de Lampedusa.
