O presidente do PP, Pablo Casado, dixo este mércores que a proposta de Ciudadanos de formar un goberno de coalición parécelle "moi ben", e incluso apuntou que o líder da formación laranxa, Albert Rivera, "sería un excelente ministro de Asuntos Exteriores".
Casado, durante unha intervención ante a prensa na súa visita a Melilla, considerou que se Albert Rivera fora o titular de Exteriores "levaría moito mellor a política contra as mentiras de México e contra a actuación de senadores franceses", en relación ao manifesto asinado por 41 deles contra a "represión" aos líderes do procés.
O dirixente popular apuntou que PP e Cs poderían formar un Goberno "tan eficaz" como o que lideran en Andalucía, ou como os acordos que alcanzaron nalgunhas autonomías, como Murcia, Castela e León, A Rioxa ou Madrid.
Con todo, e a pesar de dar a Cs a benvida "ao discurso de optimizar esforzos contra o socialismo, o comunismo e o independentismo", Casado lamentou que "chegan tarde", xa que expuxeron esta proposta o día en que se publicaban as listas electorais, "xusto cando xa non se pode facer nada".
RESPOSTA DE CS. Pola súa banda, o secretario xeral de Ciudadanos, José Manuel Villegas, respondeulle a Pablo Casado que hai que ser "un pouquiño máis serio" porque "non é tempo de ir de sobrados" nin de repartirse "cargos", senón de mobilizar aos españois e conseguir un Goberno alternativo a Pedro Sánchez.
