O presidente do Goberno en funcións, Pedro Sánchez, chamará por teléfono ao longo da mañá deste martes aos líderes de Podemos, Pablo Iglesias; do PP, Pablo Casado, e de Ciudadanos, Albert Rivera, para coñecer as súas posicións finais ante unha posible investidura. Fontes socialistas confirmaron que o secretario xeral tiña previsto chamar aos tres antes de que acudan á rolda de consultas con Felipe VI
"O compromiso do presidente en funcións Pedro Sánchez é abrir unha lexislatura sen necesidade de ir a eleccións e dispoñer dun Goberno estable que é o que necesita España", aseguran as mesmas fontes.
O primeiro na súa lista de chamadas é Iglesias, tras o que lles tocará a Casado e a Albert Rivera. Precisamente co líder de Ciudadanos, o secretario xeral do PSOE podería reunirse ao longo da mañá, antes de que acuda á cita co Rei, fixada para as 16.30 horas.
Tamén Casado irá esta tarde á rolda de contactos co Rei, ás 17.15 horas. O último en acudir será o propio Sánchez, a quen corresponde pechar a rolda de consultas cun encontro con Felipe VI ás seis da tarde.
¿ENCONTRO? Se finalmente hai reunión entre Sánchez e Rivera, sería consecuencia da carta urxente remitida polo presidente de Cs ao secretario xeral dos socialistas instándoo a manter un encontro in extremis. Nel abordaríanse as tres condicións que Ciudadanos expuxo aos socialistas a cambio da súa abstención técnica á investidura.
Este martes, o secretario xeral do grupo parlamentario socialista no Congreso, Rafael Simancas, dixo confiar en que nesta reunión Rivera comunique ao presidente en funcións a súa disposición a unha "abstención técnica". Nunha entrevista en TVE, Simancas asegurou que os socialistas seguen coa "man tendida" a Unidas Podemos para que vote si á investidura e a petición dunha abstención "técnica e patriótica" a PP e Cs "polo interese xeral e para que a gobernabilidade do país non dependa dos independentistas".
Tamén o secretario de Organización do PSOE e ministro de Fomento en funcións, José Luis Ábalos, pronunciouse este martes sobre este asunto, para remarcar que o PSOE xa cumpre as condicións propostas por Cs aínda que se esa oferta é "sincera e real" non ve "problema" en abordala.
As tres condicións propostas por Cs para absterse pasan por romper o pacto de goberno cos nacionalistas en Navarra, planificar a aplicación do 155 en Cataluña e non subir os impostos.
