A Policía portuguesa confirma que a investigación sobre Madeleine segue aberta

O Correio da Manhã publica este venres que as autoridades lusas investigan un novo sospeitoso

Madeleine McCann, antes de su desaparición. AEP
photo_camera Madeleine McCann, antes da súa desaparición. AEP

A Policía Xudicial (PJ) portuguesa confirmou este venres que a investigación sobre Madeleine McCann, desaparecida no sureño Algarve hai exactamente doce anos cando estaba coa súa familia de vacacións, continúa aberta. As pescudas seguen abertas "no ámbito da Investigación tutelada polo Ministerio Público de Portimãou", cidade do sur de Portugal, informou a PJ nun comunicado, no que recordaron que o caso se desenvolve en articulación coas autoridades internacionais.

"A Policía Xudicial, no interese da investigación, non considera oportuna a prestación de esclarecementos adicionais", engadiron as autoridades. Esta confirmación chega o día que se cumpren 12 anos da desaparición de Madeleine en Praia da Luz, no Algarve, cando estaba de vacacións coa súa familia.

A nena, de entón case catro anos, desapareceu mentres durmía xunto aos seus irmáns xemelgos no apartamento dun complexo turístico alugado polos seus pais, que se atopaban nun restaurante próximo.

En Portugal o caso pechouse en xullo de 2008, pero foi reaberto en outubro de 2013 tras atoparse novos indicios, nunha investigación paralela á que tamén mantén aberta Scotland Yard.

O diario sensacionalista portugués Correio da Manhã publicou este venres unha noticia na que asegura que as autoridades portuguesas investigan a un novo sospeitoso grazas a indicios atopados e por iso reforzaron o equipo encargado das pescudas. A PJ mantén está investigación en absoluto silencio, segundo o medio.

Polo momento, as máis de 2.000 dilixencias policiais, 500 procuras na zona e 12.000 páxinas que deixa o proceso non conseguiron arroxar luz sobre a noite que Madeleine desapareceu. 

Comentarios