Un autobús cheo de escolares foi secuestrado en Italia polo seu propio condutor, que logo lle prendeu lume sen chegar a causar vítimas entre os nenos, no que reivindicou como unha protesta contra as mortes de migrantes no Mediterráneo, segundo afirmou a Policía italiana.
Os 51 nenos e os seus dous profesores saíron ilesos antes de que o autobús no que viaxaban fose pasto das chamas nos arredores de Milán. O condutor foi detido e a Policía identificouno como Ousseynou Sy, un italiano de 47 anos de orixe senegalesa. Os medios da rexión aseguran que era un dos chofer habituais.
"Gritou: parade as mortes no mar ou levarei a cabo unha masacre", segundo afirmou o portavoz da Policía, Marco Palmieri. Un dos nenos asegurou aos xornalistas presentes no lugar do suceso que o condutor lles ameazou con asperxelos con gasolina e darlles lume. Un deles logrou chamar á Policía, que acudiu ao lugar do secuestro e rompeu os portelos para sacar aos nenos.
Palmeri confirmou que algúns nenos foron levados ao hospital como medida de precaución, por negróns ou porque estaban en estado shock, pero que ningún sufriu feridas serias.
Un dos profesores presentes no autobús contou á axencia Ansa que o condutor afirmara que quería dirixirse cara ao aeroporto milanés de Linate.
Outra nena asegurou que Ousseynou Sy culpou aos viceprimeiros ministros Matteo Salvini e Luigi Di Maio polas mortes dos migrantes africanos no mar.
O Goberno italiano pechou os seus portos ás embarcacións de ONG que rescatan inmigrantes en augas libias, unha política que Salvini defendeu asegurando que reduce as mortes no mar porque menos xente atrévese a realizar a travesía. Os grupos de Dereitos Humanos, pola súa banda, criticaron que as mortes se poden incrementar xa que agora non hai barcos de rescate buscando embarcacións á deriva.
