A infanta Cristina acudiu por primeira vez ao cárcere de Brieva (Ávila) para visitar a Iñaki Urdangarin, que ingresou na prisión o pasado luns, 18 de xuño. O encontro entre a irmá do rei Felipe VI e o seu marido produciuse o domingo, pero non se tivo constancia ata agora.
O diario El País adiantou que Cristina de Borbón conseguiu burlar á prensa grazas á axuda de Institucións Penais, que permitiu que a visita se desenvolvese nun horario diferente ao habitual –unha modificación que se adoita facer con algúns presos cando resulta oportuno–.
O encontro entre ambos, que durou uns 40 minutos, converteuse na primeira visita que recibe o exduque de Palma desde o seu ingreso en prisión. A infanta Cristina prevé continuar a súa vida familiar en Xenebra e viaxar cando sexa posible a Brieva para visitar regularmente ao seu esposo.