O secretario de Organización do PSOE, José Luis Ábalos, asegurou este mércores que xa están a intercambiar papeis con ERC para concretar o acordo para a investidura de Pedro Sánchez e plasmalo nun documento final, no que os independentistas renunciarían á vía unilateral.
"Estamos a intercambiar papeis, de feito, para concluír nese acordo final", dixo Ábalos nunha entrevista en TVE, na que incidiu en que están a ver como concretan "o acordo sobre o papel, que é o que vai contar".
O dirixente socialista non fixou data para que Sánchez sexa investido, pero insistiu en que "hai interese" de pechar "o ano cun goberno, pero máis aló diso (...) realmente, non hai nada".
"Creo que estamos máis cerca. é posible e desexable, pero non depende de nós", recalcou o tamén ministro de Fomento en funcións, que non cre que o congreso de ERC deste fin de semana sexa "determinante" nese sentido.
Respecto da negociación en si, subliñou que "non hai marxe para a opacidade" e que "todo canto se produciu comunicouse".
"Non hai máis", asegurou e, ao ser preguntado sobre se ERC renunciou á vía unilateral, respondeu: "Si, si, entendo que si".
Ábalos explicou que non se trata de ceder "", senón de iniciar un proceso de diálogo político que permita que "o conflito con Cataluña teña unha canle de expresión democrática que, ademais, non contemple ou afaste calquera decisión unilateral".
