Os socialistas do PSOE gañarían as eleccións europeas en España e conseguirían 18 escanos, dous máis que na última proxección elaborada polo Parlamento Europeo (PE) hai dúas semanas, mentres que o partido de ultradereita VOX entraría na Eurocámara con 7 eurodeputados, un máis que na última previsión.
Confirmaríase que o PSOE, co 26,8% dos votos, pasaría a ser o principal partido español no hemiciclo fronte aos seus 14 escanos actuais, mentres que o conservador Partido Popular obtería 13 eurodeputados (20% dos votos) fronte aos 15 obtidos en 2014.
Ciudadanos, pola súa banda, cun 17,3 % dos votos, baixaría nun eurodeputado en comparación coa primeira sondaxe de hai dúas semanas: chegaría a 11, fronte aos 2 únicos escanos logrados hai cinco anos.
Unidos Podemos (co 13,9% dos votos) manteríase nos 9 eurodeputados, un menos que no 2014, mentres que ERC (2,8%) lograría un escano e o PDeCAT, o PNV e EH Bildu, ningún.
Segundo esta proxección, os principais grupos políticos nunha Eurocámara de 705 asentos -na que xa non estarán os eurodeputados británicos polo Brexit (saída do Reino Unido da Unión Europea)- seguirían sendo os mesmos.
En primeiro lugar continuaría o Partido Popular Europeo con 181 escanos (36 menos que hai cinco anos) seguido dos socialdemócratas con 135 (51 menos) e os liberais de ALDE con 75 (7 máis).
Os euroescépticos da Europa das Nacións Libres (ENF) chegarían a 59 eurodeputados (22 máis que na actualidade), por diante dos Verdes, que terían 49 (3 menos); Esquerda Unitaria, con 47 (5 menos), os Conservadores e Reformistas Europeos da ERC, con 46 (29 menos), e os tamén euroescépticos de Europa das Liberdades e a Democracia Directa (EFDD), con 39 (2 menos). Os eurodeputados non adscritos serían 8, 14 menos que en 2014.
