O PSOE gañou as eleccións xerais deste domingo con 120 escanos, pero fracasou coa repetición electoral xa que se estancou en porcentaxe de votos e retrocedeu tres escanos con case o 95 por cento escrutado. O resultado do resto das forzas políticas non axuda a que some nin o bloque da esquerda e nin o da dereita para gobernar e ademais, propiciou que se acentúe o bloqueo. Así as cousas, as únicas saídas para formar goberno son dúas: ou que Pedro Sánchez alcance un acordo co PP ou que pacte con Podemos e os independentistas.
O claro triunfador da xornada foi o partido de Santiago Abascal, que pasou de 24 a 52 escanos, cumprindo co prognóstico que lle daban moitas enquisas, aínda que algunha chegou a vaticinar ata 60 escanos para este partido. Vox logrou situarse como primeira forza política na Rexión de Murcia e como segunda en Andalucía.
Parte desta vitoria foi á conta de Ciudadanos, que se esborrallou ao perder 47 deputados e quedar tan só con 10. O partido de Albert Rivera quedouse con representación en tan só catro comunidades autónomas: Andalucía, Cataluña, Madrid e Valencia.
O partido laranxa queda así nunha posición complicada por que agora xa non sumaría co PSOE para poder desbloquear a situación, como si ocorrería tras o 28 de abril, nin tampouco cos partidos da dereita, PP e Vox. Iso, a pesar de que o líder laranxa anunciou durante a campaña a súa disposición a pactar con quen obtivese máis escanos para facilitar a formación de goberno.
O Partido Popular, pola súa banda, logrou subir 22 escanos, ao pasar dos 66 deputados que obtivo o pasado 28 de abril a 88 parlamentarios. No entanto, este crecemento é moito menor do que auguraban os seus dirixentes e máis discreto que o que prognosticaran as sondaxes, que chegaron a vaticinar máis de 100 escanos.
Unidas Podemos é outro dos partidos que sufriu un retroceso no día de hoxe, aínda que aguantou a pesar de ter como competidor a Más País, nacido da costela do partido morado e liderado por Íñigo Errejón. Pablo Iglesias logrou axuntar un total de 35 escanos, dos que 26 son de Unidas Podemos; 7 achégaos EnComunPodem e 2 proceden de Podemos-EU en Galicia.
Con todo, Errejón non logrou capitalizar a perda que tivo o partido morado e a división prexudicou a ambos os partidos. Así, Más País só conseguiu entrar no Congreso con dous deputados.
Pola contra, os partidos independentistas gañaron terreo no novo Congreso e contribúen así a que se acentúe o bloqueo, salvo que Pedro Sánchez opte por contar con eles para formar un goberno.
De feito, o partido independentista catalán máis radical, a CUP, entra no Parlamento con 2 escanos. O PNV gana un e pasa a ter 7; Bildu gaña outro e pasa a contar con 5 deputados; JxCat suma un máis e terá 8; volve o BNG cun representante e só ERC perde 2 e pasa de 15 a 13.
