A Xustiza belga decidiu suspender o procedemento da euroorde para extraditar a España o expresidente catalán Carles Puigdemont e o exconseller Toni Comín ao constatar que gozan de inmunidade pola súa condición de eurodeputados. Así o confirmaron a Efe fontes da defensa de Puigdemont, segundo as cales a Xustiza belga non continuará co procedemento que se reactivou coa sentenza do procés ata que o Supremo tramite o suplicatorio ao Parlamento Europeo e este acorde retirarlles a inmunidade.
É a inmunidade que obtiveron despois de que, primeiro, o Tribunal de Xustiza da UE e, logo, o Parlamento Europeo lles recoñecese a súa condición de eurodeputados.
En Twitter, Puigdemont celebrou a noticia e remarcou que seguen esperando "a posta en liberdade de Oriol Junqueras, que ten a mesma inmunidade". "España debe actuar da mesma xeito que Bélxica e respectar a lei", di.
A defensa de Puigdemont xa esperaba esta decisión da Xustiza belga, ao entender que a actual euroorde "contradi" a normativa europea e non podía prosperar despois de que os dous eurodeputados adquirisen a inmunidade.
Ademais, levantáronse as medidas cautelares, de maneira que Puigdemont e Comín poderán saír de Bélxica sen restricións. Así, ambos poderán desprazarse a Estrasburgo (Francia) o 13 de xaneiro para acudir á sesión plenaria do Parlamento Europeo.
Ambos tamén teñen previsto participar nun acto en Perpiñán —en Francia— este mes de xaneiro.
