Os presidentes de Rusia, Vladímir Putin, e de Estados Unidos, Donald Trump, reuniranse en territorio neutral na que será o seu primeiro cume bilateral, buscado desde hai tempo por ambos co obxectivo de mellorar as maltreitas relacións entre os seus países.
A confirmación de que pronto haberá cume chegou do Kremlin, logo dun encontro de dúas horas entre Putin e o asesor de Seguridade Nacional de Estados Unidos, John Bolton, de visita en Moscova para concretar os detalles dunha esperada cita que podería celebrarse en Viena ou Helsinqui. "Elixiuse para o cume un lugar moi cómodo tanto para Rusia como para EE UU. Trátase dun terceiro país", dixo aos xornalistas o asesor de Putin para Asuntos Internacionais, Yuri Ushakov.
A data e o lugar dese encontro anunciaranse este xoves de forma simultánea polo Kremlin e a Casa Branca, precisou pouco despois Bolton ao ofrecer unha rolda de prensa na sede da axencia Interfax en Moscova. "O presidente de EE UU pediume viaxar (a Moscova) para acordar o día do encontro persoal entre os dous mandatarios", dixo Bolton.
Ushakov, que tampouco deu pistas sobre onde e cando terá lugar o cume, adiantou que será pola tarde e durará varias horas, incluirá unha cara a cara, seguramente un almorzo de traballo e unha rolda de prensa conxunta para informar dos resultados.
As relacións entre os dous países atravesan o seu peor momento desde a desintegración da Unión Soviética, sobre todo logo da anexión de Crimea por Moscova, a inxerencia de Rusia no conflito de Ucraína e o respaldo do Kremlin ao réxime sirio de Bachar al Asade. "Debo constatar que as relacións ruso-estadounidenses non pasan polo seu mellor momento. Xa o dixen publicamente e vólvoo a dicir agora: creo que isto se debe en bo medida a unha aguda loita política interna dentro de Estados Unidos", dixo Putin ao recibir a Bolton no Kremlin.
O líder ruso expresou a súa "esperanza" de que se poidan dar os primeiros pasos "para restablecer plenas relacións sobre a base da igualdade e o respecto".
Os problemas e diferenzas entre as dúas potencias son numerosas e abarcan asuntos de toda índole —desde as guerras en Ucraína e Siria, ata o desarmamento nuclear e a desconfianza mutua—, pero o máis importante para as dúas partes é tratar de canalizar un diálogo que todo o mundo bota en falta. "Non esperamos resultados concretos desa reunión, porque pasou moito tempo sen un cume oficial entre os mandatarios dos nosos países", afirmou o asesor de Trump.
