O expresidente do Goberno Mariano Rajoy xa solicitou ao Ministerio da Presidencia a asignación anual á que ten dereito co fin de cubrir os gastos de manter unha oficina, un coche oficial e persoal de seguridade.
Así llo confirmou Presidencia ao portal Maldito bulo, que presentou unha petición de información pública a través do Portal da Transparencia. Segundo a resposta de Presidencia, que este medio publicou na súa web, "ningún expresidente renunciou á dotación e D. Mariano Rajoy pediuna", e de momento está "pendente de tramitación".
Desde 1992 rexe un decreto que regula o Estatuto dos expresidentes do Goberno e que actualmente afecta, ademais, a Felipe González, José María Aznar e José Luís Rodríguez Zapatero.
DESPACHO CON DOUS CONTRATOS. Rajoy, do mesmo xeito que os demais, poderá dispor dunha especie de oficina de representación a cuxo servizo se adscribirán dous postos de traballo, un de nivel 30 e outro de nivel 18, que serán cubertos, á súa proposta, mediante o sistema de libre designación. Este persoal, que se incluirá na relación de postos de traballo correspondentes á Presidencia do Goberno, terá a consideración de persoal eventual de gabinete e, se fosen funcionarios, pasarán á situación de servizos especiais.
Ademais, facilitaráselle unha dotación para gastos de oficina, atencións de carácter social e, no seu caso, alugueres de inmobles, na contía que se consigne nos Orzamentos Xerais do Estado.
Así, nos Orzamentos de 2018 recentemente aprobados inclúese unha partida de 223.740 euros a repartir entre todos os expresidentes, o que ata agora representaba uns 75.000 euros ao ano por cabeza para Felipe González, José María Aznar e José Luis Rodríguez Zapatero.
Igualmente, deberase pór a disposición de Rajoy un automóbil de representación con condutores da Administración do Estado, os servizos de seguridade que o Ministerio do Interior estimen necesarios, e gozará de libre "pase" nas compañías de transportes terrestres, marítimos e aéreos regulares do Estado.
INCOMPATIBILIDADE CON OUTRO SOLDO PÚBLICO. Cuestión distinta é a pensión ou indemnización por cesamento á que teñen dereito todos os altos cargos, que ascende ao 80 por cento do soldo por un tempo máximo de dous anos. Con todo, esa indemnización é incompatible con calquera outro ingreso público e, polo tanto, co soldo de rexistrador da propiedade de Rajoy.
Doutra banda, segundo o estatuto dos expresidentes, estes gozarán sempre "da consideración, atención e apoio debidos a quenes desempeñaron este cargo". Por iso deben ser tratados como presidente, ocuparán un lugar protocolario especial nos actos institucionais e cando viaxen ao estranxeiro poderán contar con apoio diplomático das embaixadas.
