Uns 90 quilos de cocaína foron xa localizados flotando fronte ao litoral occidental asturiano onde, entre o venres e este domingo, foron recuperados catro fardos duns 20 quilos cada un, tres deles por un mesmo pesqueiro dedicado á costeira do bonito. O cuarto fardo, dun peso similar aos anteriores, foi localizado pouco despois deste mediodía por un dos dous helicópteros con base en Asturias que se atopan rastrexando a zona, un da Garda Civil e outro do Servizo de Salvamento Marítimo, informaron a Efe fontes do Instituto Armado.
O Cruz del Sur, un pesqueiro con base no porto asturiano de Cudillero, localizou cara ás 15.00 horas do pasado venres os dous primeiros fardos cunha sustancia sospeitosa, o que o levou a alertar á Garda Civil. Tras quedar confirmado que os fardos contiñan cocaína, o Cruz del Sur volveu este sábado a faenar á mesma zona do venres, entre as localidades de Luarca e Navia, a uns 90 quilómetros ao occidente de Xixón.
Alí, cara ás 14.00 horas, volveu "pescar" un terceiro fardo con outros 20 quilos da mesma sustancia e envolvida da mesma forma que os que atopara o venres, o que puxo en coñecemento das autoridades para que se fixesen cargo da droga.
As mesmas fontes informaron a Efe de que este sábado tamén se recuperou outro paquete solto dun quilo, polo que entre o venres e o sábado xa se acharon preto de 70 quilos de cocaína, cantidade á que se sumarán os 20 quilos do novo fardo localizado este mediodía.
A Garda Civil non descarta que os achados de fardos ou paquetes soltos se vaian sucedendo nos próximos días. De feito, ten previsto manter un operativo especial de vixilancia por terra, mar e aire en toda a costa occidental asturiana durante, polo menos, unha semana.
No dispositivo de procura e vixilancia participa unha patrulleira e helicóptero da Garda Civil, así como equipos de Salvamento Marítimo coa colaboración dos pesqueiros que se atopan faenando na zona e aos que as autoridades pediron tamén axuda.
Unha vintena de patrullas da Garda Civil tamén están a rastrexar desde terra os cantís e praias do occidente asturiano ante a posibilidade de que a marea arrastre máis fardos ata o litoral. Os fardos están feitos con sacos de arpilleira e cada un deles contén uns vinte envoltorios cubertos con filme transparente e goma de cor negra, dun quilo de peso, aproximadamente, cada un.
A Garda Civil fíxose cargo de toda a droga recuperada ata o momento e trasladouna á Comandancia de Oviedo para a súa custodia. Polo momento descoñécese se a droga foi arroxada ao mar de forma consciente, se os fardos caeron á auga de forma accidental desde algunha embarcación ou se estaban fondeados e se soltaron.
En principio, os investigadores descartan que este cargamento de droga estea relacionado co alixo de máis de dúas toneladas de cocaína que foi interceptado esta semana preto dos Azores e que pretendían introducir en Galicia. Polo momento, a Garda Civil está a rastrexar os barcos que transitaron pola zona nos últimos días na investigación que manteñen para tratar de aclarar a orixe da droga.
A Garda Civil, que agradeceu a actitude dos tripulantes do pesqueiro que localizou os fardos, recordou que se non comunicasen o seu achado ás autoridades poderían incorrer nun delito contra a saúde pública penado con máis de seis anos de cárcere.
