O rei Juan Carlos chega á clínica para ser operado do corazón: "Verédesme á saída"

O rei Juan Carlos ingresou na clínica Quirón de Pozuelo de Alarcón (Madrid) a última hora deste venres para someterse a unha intervención cirúrxica cardíaca programada para este sábado. "Verédesme á saída", asegurou don Juan Carlos desde o vehículo ante as preguntas dos xornalistas. 

Aínda que nun primeiro momento se barallou que o ingreso fose este sábado —o mesmo día da intervención—, o rei emérito, de 81 anos, ingresou ao redor das 22.00 horas nas instalacións médicas. A operación está programada para finais de agosto desde a última revisión médica feita a don Juan Carlos os pasados días 11 e 12 de xuño.

Tras ese exame, o rei emérito fixo vida normal e incluso participou o 9 de agosto no Campionato de Mundo de Vela en Finlandia, no que o seu barco, o Bribón Movistar, revalidou o seu título de campión do mundo de 6 Metros.

INTERVENCIÓNS. A operación á que se someterá este sábado será a número 17 da súa vida, moitas delas de carácter traumatolóxico.

Desde maio de 2010, cando lle extirparon un nódulo pulmonar, que resultou benigno, o rei Juan Carlos someteuse a máis dunha decena de intervencións cirúrxicas. A última delas tivo lugar o 21 de novembro de 2013 para que lle substituísen unha prótese artificial no seu xeonllo dereito. En abril pasado, ao rei emérito extirpáronlle de forma preventiva unha lesión cutánea que tiña como consecuencia da exposición ao sol.