A feira internacional de turismo Fitur, unha das máis importantes do mundo no sector, abriu este mércores as portas da súa 39 edición, a maior ata agora, e con República Dominicana como país socio. Os reis Felipe e Letizia presidiron a inauguración, á que acudiron acompañados da ministra de Industria, Comercio e Turismo, Reyes Maroto, o ministro dominicano de Turismo, Francisco Javier García, e do secretario xeral da Organización Mundial do Turismo (OMT), Zurab Pololikashvili.
O monarca e as autoridades tiveron que entrar ao recinto feiral de Madrid por unha porta non habitual debido aos bloqueos parciais e as protestas dos taxistas da capital española, que están en folga desde o luns. De feito, intentaron boicotear o acto con barricadas colocadas ante o entrada sur de Ifema e con cortes de tráfico.
O ministro dominicano destacou nunhas declaracións que o seu país é o primeiro de Latinoamérica en ser socio (invitado) de Fitur, e dixo que se trata dunha "distinción" e "un privilexio que lle permite unha promoción conxunta en toda a feira". Esta edición, que concluirá o domingo, é a máis ampla celebrada ata agora, con 886 expositores e 10.500 empresas procedentes de 165 países e rexións.
A feira chega nun momento de optimismo para o sector do turismo a nivel global, incluso se a economía internacional apunta signos de retardación do crecemento. E é que o turismo pechou 2018 coa marca de 1.400 millóns de chegadas internacionais no mundo, un 6% máis, co que se adianta en dous anos o prognóstico a longo prazo que publicou en 2010 a Organización Mundial do Turismo (OMT), segundo o cal se chegaría a esta cifra en 2020. Ademais, a OMT prevé que as chegadas internacionais crezan durante este ano entre un 3 e un 4%, en liña das tendencias históricas de crecemento.
