Os mineiros entraron na recta final do seu traballo e atópanse a menos dun metro de onde se cre que está Julen, o neno de 2 anos que caeu a un pozo o pasado 13 de xaneiro en Totalán (Málaga), pero a extrema dureza da roca que escavan está a frear o seu avance e fai necesarias novas microvoladuras.
Ás oito e media da noite, pouco despois de cumprirse 24 horas desde o primeiro acceso dos mineiros ao pozo paralelo ao de Julen, a escavación inclinada para acceder ata o pequeno alcanzara os 3,35 metros, do total de catro metros que se cren necesarios para chegar a el, segundo informou un portavoz da Garda Civil.
O portavoz precisou que esta noite se practicará unha cuarta microvoladura polas dificultades atopadas neste último tramo. Tamén precisou que, cando os rescatadores cheguen ata Julen, serán efectivos deste corpo os que procedan a sacalo.
Na zona na que se desenvolve o dispositivo hai unha continua trasfega de helicópteros, un dos cales regresou despois de voar ata Sevilla para recoller material explosivo coa intención de que os equipos de rescate non queden en ningún momento sen provisión do material para as microvoladuras controladas que axuden a desmoronar a roca.
Fóra da área de traballo, en Totalán, os pais, familiares e centenares de veciños agardan con tensa expectación as noticias sobre o rescate, pero ademais todo o país está pendente, a través da información en directo dos medios de comunicación, da sorte de Julen.
Julen leva mais de 12 días nun frío buraco de 25 centímetros no medio do campo, a mais de 70 metros de profundidade, mentres mais de 300 persoas se afanan fóra en horadar a roca e a terra que o manteñen atrapado. Nalgúns tramos a rocha é cuarcita, unha das mais dura, 7 nunha escala de 10.
Este rescate considérase o máis complexo que se acometeu en España. Decenas de máquinas, perforadoras e escavadoras removeron preto de 83.000 metros cúbicos de terras para achandar e reducir o Cerro da Coroa, a montaña en cuxo pozo se precipitou Julen mentres xogaba.
Un segundo e un terceiro helicóptero trasladaron desde Palma de Mallorca e desde Cantabria a catro gardas civís do Equipo de Montaña, especialistas en espeleoloxía e microvoladuras (dúas de cada sitio), para reforzar o dispositivo de rescate por se fora necesario facer substitucións.
O delegado do Goberno en Andalucía, Alfonso Rodríguez Gómez de Celis, informara de que se tiveron que realizar tres microvoladuras, dúas durante a pasada madrugada e unha terceira este venres pola mañá. Pero unha cuarta foi necesaria xa ben entrada a noite.
Cada microvoladura supón un proceso de traballo de máis de dúas horas, xa que primeiro dous mineiros descenden ata o punto onde se constrúe o túnel horizontal e perforan na roca varios buracos nos que despois se introducirán as cargas explosivas. A continuación, os mineiros ascenden á superficie e son relevados por dous gardas civís do Servizo de Montaña, especialistas en espeleoloxía e microvoladuras, que descenden e introducen as cargas explosivas nos orificios.
Despois, con todo o persoal na superficie, detónanse as cargas, que foron previamente preparadas polos técnicos en desactivación de explosivos (TEDAX) da Garda Civil.
Este proceso leva unha hora e media, aproximadamente, e despois hai que esperar outros 30 ou 40 minutos para extraer o aire de xeito forzado de abaixo, polo que se introduce aire para evacuar o aire contaminado e os gases que se atopan abaixo. "A montaña manda nos nosos traballos e marca o ritmo", afirmou Jorge Martín, portavoz da Garda Civil, que asegurou que "o ánimo entre os vinte e seis efectivos segue sendo igual de alto que onte (por este xoves)".
"Un mineiro nunca queda na mina e para eles, Julen é un mineiro", dixo con emotividade o delegado do Colexio de Enxeñeiros de Minas de Málaga, Juan López Escobar.
Os membros da Brigada de Salvamento Mineiro aseguran que non son heroes, só homes que forman parte dun equipo no que está a Garda Civil e os bombeiros, o equipos asistenciais, os psicólogos que acudiron a axudar e a reconfortar aos pais de Julen e tamén aos que traballan. López-Escobar transmitiu aos xornalistas este sentimento dos mineiros, que están "un pouco atafegados" co seguimento mediático.
Os sanitarios que participan nos labores e a Policía Xudicial da Garda Civil están preparados para rescatar a Julen, e na zona hai un helicóptero adaptado ao voo nocturno e disponse dunha superficie onde pode aterrar un helicóptero medicalizado, ademais de permanecer desde agardar alí desde o primeiro momento unha UVI móbil.
A portavoz do Goberno, Isabel Celaá, reiterou este venres o apoio á familia do menor e agradeceu as mostras de solidariedade do pobo e dos equipos de rescate. O presidente do Principado de Asturias, Javier Fernández, resaltou, en alusión á difícil tarefa que están a realizar os membros da Brigada de Salvamento Mineiro, que, "se alguén pode facelo son eles".
