Rusia e Turquía pactaron aplicar a partir da medianoite do xoves un cesamento do fogo na provincia siria de Idlib. Avanzouno o presidente turco, Recep Tayyip Erdogan, nunha rolda de prensa conxunta co seu homólogo ruso, Vladímir Putin, tras reunirse durante seis horas no Kremlin.
Ambos acordaron un documento que precisa os termos do cesamento das hostilidades e os intentos de Moscova e Ankara por manter en vigor o cesamento do fogo, tras varios intentos sen éxito.
O ministro de Exteriores ruso, Serguéi Lavrov, informou de que as partes acordaron que o cesamento das hostilidades se aplique dentro da zona de desescalada da tensión de Idlib a partir da medianoite. Ademais, Moscova e Ankara acordaron a creación dun "corredor de seguridade" ao longo da estrada M4, que une Alepo con Latakia.
Ese corredor, segundo puntualizou Lavrov —acompañado polo seu homólogo turco, Mevlüt Çavusoglu—, terá unha profundidade de 6 "quilómetros ao norte e 6 quilómetros ao sur". Os termos específicos do funcionamento deste corredor de seguridade serán acordados nun prazo de sete días polos ministerios de Defensa de Rusia e Turquía.
Os dous países acordaron a creación dun corredor de seguridade e dunha patrullaxe conxunta
Os dous países tamén comezarán unha patrullaxe conxunta ao longo da estrada M4 a partir do 15 de marzo, segundo explicou o xefe da diplomacia rusa, minutos despois de que Putin e Erdogan anunciasen o acordo para frear a escalada da violencia en Idlib. Desenvolverase nunha franxa a dous quilómetros ao leste e oeste da cidade de Saraqeb, considerada estratéxica e nestes momentos en mans das forzas gobernamentais.
"Acordamos un documento conxunto (...) con decisións sobre Idlib que serán unha boa base para cesar as accións militares na zona de desescalada", afirmou Putin ao presentar o pacto. O líder ruso cualificou de "positivo" o resultado da reunión con Erdogan en Moscova e confiou en que permitirá "poñer fin ao sufrimento da poboación civil" en Siria.
Turquía e Rusia, que apoian bandos distintos no conflito, alcanzaron en 2018 en Sochi un acordo para crear unha zona desmilitarizada en Idlib para impedir unha ofensiva do Exército contra a provincia, controlada por rebeldes e yihadistas.
