O líder da ultradereitista Liga, Matteo Salvini, prepara xa o seu asalto ao Goberno italiano tras retirar o seu apoio ao seu aliado, o Movemento Cinco Estrelas (M5S), o que desatou unha crise no país da que se descoñecen por agora os tempos. Comezan a contar desde xa, porque este venres presentou no Parlamento unha moción de censura contra o primeiro ministro italiano, Giuseppe Conte, para que se constate se o Executivo segue tendo os apoios necesarios para continuar ou pola contra se convoquen comicios inmediatos.
"Demasiados nons fan dano a Italia que, por contra, necesita volver crecer e volver votar rapidamente. Quen perde o tempo prexudica ao país e só pensa na poltrona", lese nunha nota do partido, tras a presentación da moción no Senado.
Salvini quere ser o próximo primeiro ministro de Italia e é consciente de que agora goza dunha popularidade que, segundo as sondaxes, o colocará na presidencia do Executivo coa axuda dunha coalición de dereitas, pois só non suma maioría. Nese punto, precipitou esta crise de verán no país porque sabe que está a vivir o seu momento.
O líder da liga, que o xoves xa mantivo unha tensa reunión con Conte, insistiu este venres en que quere "darlle a palabra aos italianos" e confirmou que se presentará como candidato a primeiro ministro, aínda que non aclarou se dimitiría como responsable de Interior en caso de confirmarse a nova cita electoral. "Espero que (Giuseppe) Conte non pense noutro goberno como primeiro ministro", dixo.
As sondaxes danlle unha intención de voto do 36%, e sumaría maioría absoluta contando con Forza Italia e Irmáns de Italia
PROXECCIÓN. Salvini fíxose coas rendas da entón Liga Norte en 2013, cando a formación obtivo só un 4% dos votos —os peores resultados da súa historia— e en 2018 eliminou a palabra Norte para facer do seu partido unha formación de carácter nacional, unha estratexia que lle deu un 17% das papeletas nos comicios xerais do pasado ano.
Pactou entón co M5S, que o dobraba en sufraxios con máis do 32%, e pediu a carteira de Interior, na que practicou unha política de contención da inmigración ilegal que lle deu a simpatía de gran parte do electorado. Pero non se limitou ao seu ministerio, porque neste último ano Salvini opinou de todos os asuntos políticos e económicos, e ata organizou reunións cos sindicatos e empresarios, sen contar co primeiro ministro, Giuseppe Conte, e o ministro de Economía, Giovanni Tria.
As últimas sondaxes danlle unha intención de voto do 36%, e sumaría maioría absoluta en coalición cos seus dous socios conservadores, Forza Italia, do exprimeiro ministro Silvio Berlusconi, e Irmáns de Italia, pois cada un conseguiría máis dun 7%.
Salvini deu por rota a alianza de Goberno o xoves, tras o que Conte o acusou de dinamitala para aproveitar o seu tirón
A RUPTURA. As discrepancias da Liga co M5S en materias como inmigración, emprego, seguridade, axudas sociais, fiscalidade, desenvolvemento ou infraestruturas sempre estiveron latentes, pero o detonante foi a liña ferroviaria de alta velocidade Turín-Lyon, que o M5S considera un malgasto e a Liga, unha obra estratéxica para o país. O pasado mércores, Salvini e os seus rexeitaron no Senado a moción dos seus socios, o M5S, para frear estas obras e un día despois anunciou que daba a alianza de Goberno por rota.
Agora, esixiu que os senadores e deputados regresen a Roma das vacacións para que Conte poida acudir ás cámaras e constatar a súa falta de apoios antes de presentar a súa dimisión ante o xefe do Estado, Sergio Mattarella.
Conte ofreceu na noite do xoves unha dura mensaxe no que acusou a Salvini de dinamitar a coalición para aproveitar o seu tirón electoral, tras as eleccións europeas, nas que foi o primeiro partido do país, e avanzou que acudiría ao Parlamento para que Salvini dese explicacións.
As contas
Para continuar no Goberno, Conte necesitaría os apoios do M5S e tamén do Partido Demócrata (PD, centroesquerda), pois a Liga e os seus socios coaligados, Forza Italia e Irmáns de Italia, xa avanzaron que queren eleccións. Se Conte constata que non ten apoios debería acudir ante o xefe do Estado para presentar a súa dimisión.
¿Eleccións?
Neste caso, Mattarella podería disolver o Parlamento e convocar eleccións, que se celebrarían nun prazo mínimo de 45 días e nun máximo de 70 —é dicir, na segunda metade de outubro—, intentar a formación dun Goberno coa composición actual do Parlamento, ou designar un tecnócrata e provisional, opción que rexeitaron tanto a Liga como o M5S.
