O Goberno anunciou un plan para as comunidades produtoras afectadas polos aranceis de EE UU —como a redución de peonadas para Estremadura e Andalucía— e xunto ao sector esixe unha resposta firme a Bruxelas, onde este mércores acode o ministro Luís Planas para analizar a situación.
O presidente do Goberno en funcións, Pedro Sánchez, asegurou —nun acto político en Xaén— que haberá un plan de acción para o sector agroalimentario e gandeiro en todas as comunidades autónomas afectadas, "cada cal cos seus instrumentos". Neste sentido, detallou que este plan incluiría en Estremadura e Andalucía a redución das peonadas necesarias para poder acceder ao subsidio agrario.
Mentres, o ministro de Agricultura, Pesca e Alimentación en funcións, Luís Planas, reuniuse este martes con representantes das organizacións e cooperativas agrarias e a industria agroalimentaria, e insistiu na necesidade de unidade. Aínda que "non é bo para ninguén" entrar nunha "guerra comercial", os intereses "deben ser defendidos firmemente" e iso require "consenso", afirmou.
Sánchez anuncia un plan de acción para agricultores e gandeiros de todas as comunidades que atenderá as necesidades específicas en cada unha delas
Planas cifrou en 200 millóns o que tería que desembolsar o sector se entran en vigor as taxas (nun cálculo a partir dos 765 millóns de euros de negocio que cada ano xeran as vendas dos produtos españois afectados).
O ministro reunirase este mércores cos aínda comisarios de Comercio, Cecilia Malmström, e de Agricultura e Desenvolvemento Rural, Phil Hogan, para analizar a situación e conseguir un adiamento da entrada en vigor dos aranceis ou a súa cancelación.
Entre as medidas que se expón solicitar á Unión Europea (UE), se se mantén a decisión estadounidense, está o almacenamento privado de aceite (unha das producións máis afectadas), o apoio á promoción para buscar terceiros mercados e axudas para o sector, como as que xa se outorgaron en casos como o veto ruso a produtos comunitarios.
Desde o sector, e en declaracións aos medios de comunicación tras o encontro con Luís Planas, insistiron en rexeitar que se lles utilice como "moeda de cambio" nas disputas comerciais internacionais, en expresar con contundencia o seu "rexeitamento" ao anuncio de EE UU e en esixir unha resposta firme á Unión Europea.
Tanto o Executivo como o sector esixen firmeza á UE na súa resposta
O presidente de Cooperativas Agro-alimentarias de España, Ángel Villafranca, manifestou que espera que a UE sirva de paraugas baixo o que "sentirse apoiado" nestes momentos. O presidente da organización agraria Asaja, Pedro Barato, reclamou "compensacións económicas para paliar a situación" se finalmente entran en vigor as taxas.
O secretario xeral de COAG, Miguel Blanco, sinalou que, de producirse a subida arancelaria, "haberá que ir a un plan B" con accións como a intervención pública dos produtos afectados. Lorenzo Ramos, secretario xeral de UPA, non entende que a Organización Mundial do Comercio (OMC) permita usar os produtos alimentarios nos "vetos ou aranceis" por mor de problemas noutros sectores.
Desde a Federación de Industrias da Alimentación e Bebidas (FIAB), o seu director xeral, Mauricio García, confía na acción "decidida" da UE, pois unha "guerra" non interesa a ninguén e "dana" as relacións comerciais e a "confianza" entre os países. O presidente da Asociación da Industria e o Comercio Exportador do Aceite de Oliva, (Asoliva), José Pont, recordou que a taxa se aplica aos envasados pero non ao granel: "Enfróntaste ao dilema de perder o mercado, asumir un 25 % ou envasalo en EE UU, que é o que quere Trump".
O director xeral da Federación Española do Viño (FEV), José Luís Benítez, expresou o seu temor ao comezo dunha "guerra comercial" entre a UE e EE UU que vaia "in crescendo"; mentres que o secretario xeral da Asociación de Exportadores e Industriais da Oliva de Mesa (Asemesa), Antonio de Mora, apostou por responder a Estados Unidos "coas mesmas armas".
Para o presidente da Federación de Exportadores de Froitas e Hortalizas (Fepex), Jorge Brotons, o arancel supón a "puntilla" a un destino que se estaba complicando nos últimos anos por todas as barreiras fitosanitarias. Á reunión asistiron tamén representantes da industria láctea e cárnica así como membros do Ministerio de Industria, Comercio e Turismo.
