O presidente do Goberno en funcións, Pedro Sánchez, acusou este luns ao líder de Podemos, Pablo Iglesias, de romper a negociación para a investidura de forma "unilateral" ao convocar unha consulta "trucada" coa que o único que pretende, dixo, é xustificar o seu voto negativo, que coincidirá co da "extrema dereita".
Nunha entrevista na Cadea Ser, Sánchez confirmou que a semana pasada ofreceu a Iglesias ministerios para "persoas cualificadas do ámbito de Podemos", e recalcou que é a primeira vez que se fai unha oferta así na historia da democracia, a un partido que, ademais, foi o cuarto nas eleccións.
O líder socialista considerou que a consulta de Podemos é unha "mascarada" e "non recolle a realidade" porque non fai constar as propostas que lle fixo a Iglesias, moito menos esta última que lle puxo sobre a mesa na última conversación da semana pasada.
A pregunta de Podemos para a consulta é "absolutamente falsa", insistiu Sánchez, para quen Iglesias deixou claro que non se move da súa posición e que o que busca é "xustificar unha votación contraria" á investidura a semana que vén, en liña, por exemplo, "coa ultradereita".
