O presidente do Goberno, Pedro Sánchez, pedirá a semana que vén ao Congreso dos Deputados unha nova prórroga do estado de alarma, prórroga que durará "aproximadamente un mes" pero que se negociará cos grupos parlamentarios e que pode ser "asimétrica" e terminar antes nuns territorios que noutros.
"Esperemos que sexa o último estado de alarma", afirmou Sánchez nunha rolda de prensa telemática no Palacio da Moncloa, na que insistiu en que este camiño "é o único posible" e que, coa excepción das liberdades de movemento e de reunión, "todos os dereitos e liberdades seguen intactos".
Con intención de que sexa a última prórroga, Sánchez sinalou que a duración negociarase con transparencia cos grupos que estiveron dispostos a negociar, porque "Vox e o PP xa dixeron que non sen coñecer a proposta", aínda que engadiu que esa dirección non será "un capricho político", senón que se baseará no criterio dos científicos, que dixeron que para avaliar o impacto das sucesivas medidas de alivio necesítanse 14 días.
ESTADO DE ALARMA Á CARTA. Ademais, puntualizou que o estado de alarma poderá ser "asimétrico, con todas as consecuencias", de maneira que podería levantarse antes nalgúns territorios, incluso antes de que pase ese período aproximado dun mes, porque "o Goberno non ten interese en prolongar as restricións á mobilidade e ao dereito de reunión" máis aló dos motivos epidemiolóxicos.
"Se o Goberno de España ve nese mes que se pode levantar o estado de alarma en todo o territorio ou nunha parte non teñan dúbida de que o faremos", afirmou Sánchez.
En canto á esixencia de ERC de que se cre a mesa negociadora sobre Cataluña, Sánchez afirmou que o seu Goberno quere abordar a "crise política" en Cataluña, que considera unha "crise herdada", pero pediu desligar esta reivindicación da negociación do estado de alarma.
NEGOCIAR REFORMAS LEXISLATIVAS. Sánchez tamén aclarou que o Goberno quere aproveitar esas semanas finais de estado de alarma para negociar cos grupos reformas legais, por exemplo da Lei Xeral de Saúde pública, para ver como se pode "gobernar" a situación e "manter baixo control o virus" unha vez terminado o estado de alarma.
Se o aproba o Congreso, o novo período de alarma tamén será distinto en que, a partir dese momento, o ministro de Sanidade, Salvador Illa, será o mando único neste novo período dun mes, baixo o sistema de coordinación coas autonomías que se denominou cogobernanza.
Así, decaerá a competencia que ata agora teñen delegada, tamén no marco do estado de alarma, os ministros de Defensa, Transportes e Interior, no que Sánchez chamou "unha desescalada institucional". Polo mesmo motivo, asegurou que tamén rexerá a "cogobernanza" coas comunidades autónomas.
O presidente recordou que os feitos demostraron que non se podía confiar na inmunidade comunitaria e defende a necesidade de limitar a mobilidade e os contactos sociais: "A esa lóxica responde a desescalada".
"DEPENDERÁ DA DISCIPLINA SOCIAL E A UNIDADE INSTITUCIONAL". "Non dependerá do criterio político, dependerá da disciplina social, do grao de unidade institucional que despreguemos nas próximas semanas e de que antepoñamos o criterio da saúde pública a outra serie de criterios", avisou, aproveitando para facer un chamamento a arrimar "o ombreiro" e deixar atrás discrepancias.
Os ritmos, insistiu, "a marca a ciencia". Así, agora estase comprobando o impacto das saídas dos menores de 14 anos, e a próxima avaliarase o dos paseos e as saídas para facer deporte.
Para Sánchez, a necesidade do estado de alarma está avalada polo estudo de seroprevalencia, cuxos primeiros resultados mostran que "unha porcentaxe moi menor", apenas do 5 por cento da poboación española, estivo en contacto co virus.
"Estamos aínda nun escenario de vulnerabilidade", advertiu, recalcando que non tería sentido permitir que un residente en Madrid poida desprazarse á súa segunda residencia en Murcia ou en Almería.
