O presidente do Goberno, Pedro Sánchez, e o presidente de estadounidense, Donald Trump, coincidiron este mércores por primeira vez no cume de líderes da Otan e puideron saudarse e manter un pequeno intercambio de palabras ao comezo da reunión.
O momento, en presenza da ministra de Defensa, Margarita Robles, foi inmortalizado cunha foto difundida polo Palacio da Moncloa na conta de Twitter de Sánchez. Polo momento non parece que ambos vaian conversar máis aló do protocolario xa que non hai prevista ningunha reunión bilateral entre ambos.
Saludo del PG, @sanchezcastejon, con el presidente de EEUU, Donald Trump @POTUS, previo al inicio de la reunión plenaria del #NATOSummit #WeAreNATO pic.twitter.com/5J8zjQLw3z
— La Moncloa (@desdelamoncloa) 11 de xullo de 2018
Aínda que é a primeira vez que ambos os mandatarios coinciden fisicamente, xa tiveron contacto por carta, despois de que Trump dirixira unha misiva ao español esixíndolle aumentar o gasto en defensa, do mesmo xeito que á maioría de gobernos europeos.
A cuestión do gasto militar é a cruzada coa que o presidente estadounidense chegou ao cume e estivo uns días caldeando o ambiente, primeiro a través das cartas e despois vía Twitter, onde plasmou as súas queixas sobre o "inxusto" sistema de financiamento da Otan e a achega, ao seu xuízo, demasiado alta de Estados Unidos en comparación cos demais aliados.
Sánchez xa mantivo en Bruxelas senllos encontros coa primeira ministra británica, Theresa May, coa que abordou a situación da poboación do Campo de Xibraltar tras o Brexit, e coa norueguesa, Erna Solberg, a quen expresou a súa preocupación polos pescadores españois que traballaron en buques do país nórdico e reclaman a súa pensión a Noruega.
Este xoves espérase que se reúna co primeiro ministro de Canadá, Justin Trudeau, e co seu homólogo holandés, Mark Rutte.
