A Comisión Nacional de Mercados e a Competencia (CNMC) sancionou a Mediaset con 1.094.006 euros e 207.302 euros en dous expedientes pola emisión de contidos audiovisuais que poden resultar prexudiciais para o desenvolvemento físico, mental e moral dos menores.
Segundo explica Competencia, o primeiro expediente agrupa seis sancións en relación cos programas Sálvame Naranja e Sálvame Limón emitidos na cadea Telecinco os días 8, 9 e 10 de xaneiro de 2018.
No segundo expediente sancionador agrúpanse outras dúas por contidos emitidos en Sálvame Naranja do pasado 9 de febreiro.
A CNMC xa requirira previamente a Mediaset para que adecuase a cualificación por idades do programa Sálvame á normativa audiovisual.
Tras ese requirimento, Mediaset separou o programa en dous bloques: Sálvame Limón, que se emite entre as 16:00 e as 17:00 horas coa cualificación de non "recomendado para menores de 12 anos" (NR-12), e Sálvame Naranja, que se emite a partir das 17:00 coa cualificación "non recomendado para menores de 7 anos (NR-7)".
A CNMC recorda que contra esta resolución Mediaset poderá interpor directamente recurso contencioso-administrativo ante a Audiencia Nacional no prazo de dous meses a partir do día seguinte ao da súa notificación.