Sanidade alerta da presenza de estramonio nas acelgas en conserva da marca Ybarra

De momento, provocou a intoxicación de dúas persoas na Comunidade de Madrid que evolucionan favorablemente

Bote de acelgas. YBARRA.ES
photo_camera Bote de acelgas. YBARRA.ES

A Axencia Española de Consumo, Seguridade Alimentaria e Nutrición (Aecosan) alertou este venres da presenza de estramonio nun lote de acelgas en conserva, da marca Ybarra, que provocou a intoxicación de dúas persoas na Comunidade de Madrid, que evolucionan favorablemente.

Segundo a alerta da Aecosan, organismo dependente do Ministerio de Sanidade, Consumo e Benestar Social, "o produto implicado é Acelgas, marca Ybarra, conserva envasada en frasco de cristal, peso neto 660 g e peso escurrido 425 g. O número de lote que se está retirando é o 18023".

Os produtos foron fabricados en Navarra e distribuídos ás comunidades de Andalucía, Cataluña, Castela e León, Madrid e Comunidade Valenciana. "Recoméndase aos consumidores que puidesen ter os produtos das marcas anteriormente mencionadas nos seus fogares, que se absteñan de consumilos", afirma a Aecosan.

A sintomatoloxía derivada do consumo leva síntomas como sequedade de mucosas, mareos, visión borrosa e sudoración, entre outros.

Os dous afectados pola intoxicación atópanse ben, segundo fontes da consellería de Sanidade da Comunidade de Madrid, e non requiriron hospitalización. A Aecosan indica que tivo coñecemento a través do Sistema Coordinado de Intercambio Rápido de Información (SCIRI) da notificación de alerta trasladada pola Comunidade Autónoma de Madrid.

Comentarios