O Tribunal Supremo do Reino Unido fallou este martes, cun veredicto unánime, en contra do primeiro ministro Boris Johnson, ao considerar "ilegal" a suspensión do Parlamento durante cinco semanas. Nun fallo histórico, a presidenta do Supremo, Brenda Ale, afirmou que a suspensión das cámaras, adoptada polo líder conservador o pasado agosto, foi "nula" e queda "sen efecto".
Os once xuíces da máxima instancia xudicial deste país tiñan que examinar dous recursos diferentes: o da Corte de Apelación de Escocia, que considerou ilegal a medida adoptada polo xefe de Goberno, e a do Tribunal Superior de Londres, que determinou que a cuestión era competencia política.
O panel de maxistrados valorou que o asesoramento de Johnson á raíña Isabel II, xefa de Estado, para proceder ao peche parlamentario —do 9 de setembro ata o 14 de outubro, pouco antes do Brexit— non se axustou á legalidade pois perseguía "frustrar ou impedir" que o Parlamento desempeñase as súas "funcións constitucionais". "Este tribunal conclúe que a decisión de aconsellar á súa Maxestade que suspendese o Parlamento foi ilegal porque tiña o efecto de frustrar ou impedir a capacidade do Parlamento de levar a cabo as súas funcións constitucionais sen unha xustificación razoable", afirmou Ale.
O presidente da Cámara dos Comúns deu a "benvida" ao fallo do Supremo
As dúas cámaras de Westminster quedaron clausuradas ao termo das sesións do pasado 9 de setembro ata o 14 de outubro, cando estaba previsto que a raíña Isabel II inaugurase un novo curso parlamentario ao ler a nova axenda do Goberno de Johnson. Este mesmo martes, coñecida a resolución xudicial, o presidente da Cámara dos Comúns, John Bercow, informou este martes de que deu instrucións para que o Parlamento renove este mércores as súas sesións.
"Dou a benvida ao fallo do Tribunal Supremo de que a suspensión do Parlamento foi ilegal. Os xuíces rexeitaron a afirmación do Goberno de que pechar o Parlamento durante cinco semanas era simplemente unha práctica normal a fin de permitir un novo discurso da Raíña (programa do Executivo)", engadiu.
O líder do Partido Laborista británico, Jeremy Corbyn, pediu este martes a Boris Johnson que "reconsidere a súa posición" á fronte do Goberno. Nunha intervención especial durante o congreso laborista en Brighton, Corbyn adiantou que pedirá ao presidente da Cámara dos Comúns que dispoña canto antes a continuación das sesións parlamentarias.
Corbyn pide a dimisión de Johnson e que se renove o Parlamento
A proximidade coa data pactada para a execución do Brexit, o 31 de outubro, xerou unha onda de críticas contra Johnson, que xustificou a medida co argumento de que precisaba dese tempo para poder elaborar a nova axenda lexislativa do seu Executivo. Ao ler o seu ditame, a presidenta do Supremo subliñou que esta suspensión prolongada da democracia parlamentaria produciuse nunhas circunstancias bastante excepcionais: o cambio fundamental que ía producirse na Constitución do Reino Unido. "O Parlamento, e en particular a Cámara dos Comúns como representantes electos dos cidadáns, teñen o dereito a ter voz en como se produce ese cambio. O efecto sobre os fundamentos da nosa democracia foi extremo", remarcou con dureza a xuíza.
PRIMEIRO MINISTRO. Boris Johnson reaccionou á resolución asegurando —en declaracións á BBC— que o seu Goberno "respectará" o fallo do Tribunal Supremo. O político conservador, que se mostrou "en profundo desacordo" co histórico veredicto da máxima instancia xudicial do país, atópase en Nova York, onde participa nunha reunión da Asemblea Xeral da Onu.
"O importante é que continuemos e executemos o Brexit o 31 de outubro", agregou Boris Johnson, que asegurou que "hai moitísimas persoas que queren evitar que este país salga da UE". "O Reino Unido abandonará a UE o 31 de outubro, pase o que pase", insistiu.
