Unha chapa de ferro dunha tonelada, posiblemente a tapa do reactor que explotou este martes nunha industria química de Tarragona, voou uns tres quilómetros, entrou pola fiestra dun edificio, ocasionou a caída do chan dun piso e a do teito do de abaixo e matou o home que vivía alí.
O alcalde de Tarragona, Pau Ricomà, explicou este case "inverosímil" suceso como "hipótese máis probable" que manexan os técnicos para coñecer a causa da morte de Sergio Millán, de 59 anos, que faleceu na súa casa do barrio tarraconense de Torreforta a consecuencia da explosión na industria IQOXE, situada no municipio da Canonja.
Como resultado do suceso faleceron dúas persoas e resultaron feridas outras oito, todas elas traballadoras da empresa excepto o veciño de Torreforta.
O alcalde puntualizou que a chapa, de dous metros de longo por un de ancho, voou "en liña recta" uns tres quilómetros para "entrar pola fiestra", ao parecer aberta no momento da explosión na fábrica, do piso terceiro do inmoble situado no número 7 da praza García Lorca de Tarragona. A forza e a velocidade da chapa fixo caer o chan de parte dese piso e o teito da vivenda situada debaixo para, finalmente, matar o propietario desta casa.
Ricomà explicou que pola noite traballouse coa hipótese de que a onda expansiva da explosión fora a que ocasionara a rotura de vidros na casa da vítima, e que a caída dos mesmos provocara a súa morte.
O alcalde precisou que, pasadas as horas, revisada a casa e "recollido in situ" o relato das testemuñas, "todo parece indicar" que seguramente a tapa do reactor foi a causante da morte de Sergio Millán, persoa moi coñecida no barrio de Torreforta, onde posuía desde hai ano un comercio. "É a hipótese máis probable", dixo Ricomà, á espera de que o acaben de confirmar os técnicos".
O consistorio decretou dous días de duelo polo accidente.
