A primeira ministra británica, Theresa May, atrasará a votación sobre o acordo do Brexit, prevista en principio para este martes na Cámara dos Comúns, segundo adiantou este luns a cadea BBC.
Dous membros do gabinete de May, de acordo coa emisora pública británica, indicaron que a decisiva votación será aprazada para conseguir un maior consenso.
A xefa do Goberno ten previsto facer este luns unha declaración sobre a retirada do Reino Unido da Unión Europea (UE) a partir das 15.30 GMT, cando se prevía que comezase a cuarta xornada do debate sobre o pacto do Brexit.
O acordo do Brexit xerou un amplo rexeitamento entre os parlamentarios por mor da polémica 'salvagarda'
O atraso da votación coñeceuse momentos despois de que a mesma residencia oficial de Downing Street indicase que se celebraría como estaba "planeado", a pesar de que todo apuntaba a que o pacto sería rexeitado polo Parlamento.
Deputados conservadores euroescépticos e da oposición xa anticiparan que votarían en contra do tratado, negociado durante máis de 15 meses entre Londres e Bruxelas.
O fin de semana, a primeira ministra conversou sobre este asunto por teléfono co presidente do Consello Europeo, Donald Tusk; o presidente da Comisión Europea, Jean-Claude Juncker; o primeiro ministro irlandés, Leo Varadkar, e o holandés, Mark Rutte.
O acordo do Brexit xerou un amplo rexeitamento entre os parlamentarios por mor da polémica "salvagarda", pensada para evitar unha fronteira física entre Irlanda e Irlanda do Norte.
Esa garantía "" prevé que o país permaneza na unión aduaneira e que Irlanda do Norte tamén estea aliñada con certas normas do mercado único, ata que se estableza unha nova relación comercial entre Londres e Bruxelas, negociada no período de transición –entre o 29 de marzo de 2019 e finais de 2020–.
