O presidente da Generalitat, Quim Torra, puxo esta noite ao seu goberno como exemplo dun executivo "responsable" que "acorda, dialoga e fala", e asegurou que esta característica fai que nunca nos levantemos da mesa do diálogo".
Torra defendeu o carácter "dialogante" do seu goberno durante a súa intervención en La Nit de l'Empresari, un acto organizado pola patronal Cecot, coincidindo co intercambio de reproches que mantivo estes días co presidente do Goberno, Pedro Sánchez, por mor das protestas contra a sentenza do "procés".
"Os gobernos responsables son os que acordan, dialogan e falan. Dialogar e pactar é o noso carácter. Non nos levantamos nunca da mesa do diálogo e temos un teléfono para chamar e para recibir chamadas", dixo Torra ante o case milleiro de empresarios que enchían a sala grande do Teatre Nacional de Cataluña (TNC).
O presidente catalán fixo referencia así aos reproches que se cruzaron estes días el e Sánchez, que lle reclamou en varias ocasións que condene expresamente a violencia destes últimos días en Cataluña antes de dialogar.
Torra admitiu que "son días difíciles" e agradeceu os berros de "liberdade" coreados pola maioría dos empresarios presentes no auditorio cando o presidente de Cecot, Antoni Abad, recordou aos líderes independentistas encarcerados.
