O presidente da Generalitat, Quim Torra, trasladou este xoves ao vicepresidente do Govern, Pere Aragonès, que o acordo entre ERC e o PSOE de establecer unha mesa de negociación entre gobernos para buscar unha solución ao conflito en Cataluña "non ten o visto e prace do Govern nin o asume como tal".
Fontes da Presidencia da Generalitat explicaron a Europa Press que Torra pediu explicacións a Aragonès sobre o pacto e defendeu que non se pode negociar nada co Goberno español á marxe dos acordos do Govern". Os dous reuníronse este xoves no Palau da Generalitat para avaliar o pacto que ERC alcanzou co PSOE e que contempla unha mesa de negociación entre a Generalitat e o Goberno para buscar unha saída ao conflito catalán, e inclúe unha consulta á cidadanía de Cataluña sobre as conclusións que saian desa mesa.
Aínda que o Consell Nacional de ERC debe decidir este mesmo xoves se valida este pacto e facilita a investidura de Sánchez, desde JxCat xa xurdiron críticas a este acordo e ambos acordaron reunirse para abordar esta situación.
"ENTRE PARTIDOS". As fontes de Presidencia consultadas resaltan que Torra pediu explicacións a Aragonès sobre o acordo de ERC co PSOE no que poida afectar o Executivo catalán: "Queda claro que o acordo ERC-PSOE non ten o visto e prace do Govern nin o asume como tal. É un acordo entre partidos".
Torra asegura que non se pode negociar nada co Goberno español á marxe dos acordos do Govern"
As mesmas fontes engadiron que calquera acordo co Goberno central debe estar xestionado e validado pola Presidencia do Govern e que as negociacións deben permitir unha votación clara sobre a independencia, e sinalaron que ninguén se mobilizou de forma masiva por un novo estatuto nin ningunha mellora do autogoberno que non sexa a independencia".
Destacaron que a posición común consensuada son acordos como o comunicado conxunto do presidente e o vicepresidente de reacción á sentenza, a declaración da Assemblea de Cargos Electos e as resolucións do Parlament: "De aquí non se moverá o presidente Torra: exercicio do dereito de autodeterminación, fin da represión e amnistía".
"TON CORDIAL". Pola súa banda, Aragonès pediulle ao presidente defender xuntos a autodeterminación nesta mesa de negociación co Estado que os republicanos acordaron co PSOE para desencallar a investidura de Pedro Sánchez, segundo fontes da Vicepresidencia.
Así mesmo, o vicepresidente recordou que a defensa da autodeterminación xa consta no acordo que o Govern tomou en outubro como reacción á sentenza do 1-O. As mesmas fontes aseguraron que o encontro, celebrado á primeira hora da mañá no Palau da Generalitat, tivo un "ton cordial, como sempre", e que durou menos dunha hora.
