O Tribunal de Contas condenou ao expresidente catalán Artur Mas e a outros ex altos cargos autonómicos a devolver case cinco millóns de euros gastados pola Generalitat de Cataluña en organizar e celebrar a consulta independentista ilegal do 9 de novembro de 2014.
Segundo a sentenza, á que tivo a acceso Efe, foron condenados Mas, os exconsellers Francesc Homs, Irene Rigau e Joana Ortega e seis persoas máis polos gastos orixinados pola consulta do 9N, cifrados en 4.946.788,16 euros.
O Tribunal de Contas considera responsables contables directos aos citados, así como a Luis Bertrán Saura, Josefina Valls, Jaume Domingo Planas, Ignaci Genovés, Jordi Vilajoana e Teresa Prohias.
Condénaselles a reintegrar á Generalitat a suma en que se cifra o alcance das súas respectivas responsabilidades. Así, por exemplo, a Mas fáiselle responsable do total dos 4,9 millóns de euros e, ao resto, vánselles imputando importes en función do seu papel no 9N.
Por exemplo, Francesc Homs debe responder por case 3,5 millóns por diversos conceptos; Irene Rigau, de 2,8 millóns pola compra dos 7.000 computadores empregados nas mesas de votación, e Joana Ortega, por algo máis de 1,7 millóns de euros.
Nos casos nos que concorre a responsabilidade de varios demandados respecto dun mesmo concepto, a responsabilidade de todos eles é solidaria en relación cos danos causados, di a sentenza.
Para o Tribunal de Contas, non cabe dúbida de que tanto Mas como os demais membros do seu Goberno demandados non só non eran alleos ás decisións de gasto público da Generalitat, senón que eran os "máximos responsables" destas decisións.
O ano pasado, este Tribunal ordenou o embargo preventivo da vivenda que Artur Mas puxo para cubrir parte da fianza de 5,2 millóns de euros que lle impuxo polo gasto de diñeiro público na consulta do 9N.
Tras consignar 2,9 millóns de euros en efectivo, Mas e os exconsellers Francesc Homs, Joana Ortega e Irene Rigau e o ex secretario xeral de Presidencia Jordi Vilajoana depositaron o 23 de novembro do ano pasado varios inmobles como garantía para cubrir a fianza.
