O presidente de Estados Unidos, Donald Trump, anunciou este mércores novas "poderosas" sancións contra Irán ata que "cambie o seu comportamento" e asegurou que segue avaliando "opcións" para responder o ataque contra bases militares estadounidenses en Iraq.
"Mentres seguimos avaliando opcións, Estados Unidos inmediatamente imporá sancións adicionais contra o réxime iraniano. Estas sancións estarán en vigor ata que Irán cambie o seu comportamento", avisou o mandatario.
Trump, nunha conferencia especial, confirmou que "non houbo baixas mortais" e que o dano material foi "mínimo" nos ataques con mísiles balísticos lanzados na noite do martes por Irán contra dúas bases en territorio iraquí que albergan tropas estadounidenses.
"Ningún estadounidense sufriu danos no ataque de onte á noite. Non sufrimos baixas mortais", dixo Trump na súa declaración á nación desde a Casa Branca, rodeado polo alto mando militar.
Ademais, o presidente de Estados Unidos pediu a potencias como o Reino Unido, Francia e Rusia que rompan co acordo nuclear de 2015 con Irán para renegociar un novo pacto, un día despois do ataque iraniano contra dúas bases onde había tropas estadounidenses en Iraq.
"Debemos traballar todos xuntos cara a un acordo con Irán que faga o mundo un lugar máis seguro e pacífico", dixo Trump nun discurso dirixido á nación.
