O exconseller e deputado de JxCat Jordi Turull, que leva trece días en folga de fame no cárcere de Lledoners (Barcelona), deixará por agora de realizar traballos penais e permanecerá na enfermería de prisión.
Así o indicaron fontes do seu grupo parlamentario, despois de que Turull fora trasladado este venres á enfermería do cárcere por indicación facultativa, ao resentirse o seu estado de saúde.
Os catro presos de JxCat en folga de fame -Jordi Sànchez, Josep Rull, Joaquim Forn e o propio Jordi Turull- son obxecto de seguimento médico diario para controlar diversos indicadores de saúde.
Este venres, ao recibir os resultados das análises do día anterior, segundo JxCat, observaron que había as "alteracións habituais nos casos de persoas que fan folgas de fame" e os servizos médicos pediron a Turull que se traslade á enfermería para poder facer un seguimento mellor".
Isto significa, apuntaron desde JxCat, que Turull "deixa de facer traballos" e, en lugar de estar na cela, permanecerá na enfermería, onde lle farán "controis máis a miúdo". Con todo, Turull "continúa recibindo visitas, traballando cos avogados e escribindo", engadiron fontes do seu grupo.
