Twitter suspendeu 259 contas operadas polo Partido Popular dedicadas a potenciar a opinión pública "de xeito artificial" nas semanas anteriores á convocatoria electoral do 28 de abril e a aumentar a interacción mediante "comportamentos de spam", segundo informou a propia rede social.
Na nova actualización do seu informe de transparencia, a plataforma comunicou o peche dunha rede de contas do PP que estivo activa "durante un período relativamente curto de tempo", concretamente durante os meses de febreiro e marzo de 2019.
Todas elas creáronse neste período de dous meses, e segundo as conclusións da rede social, presentaban un "comportamento de spam" e dedicábanse a retuitear outras mensaxes e a outras contas "para aumentar a interacción".
Ante esta revelación, o PP informou a Efe que "nunca creou contas falsas" e que esta operación podería responder ao que "poidan facer os usuarios da rede que, baixo a súa responsabilidade, interactúan coas contas" do partido.
Do mesmo xeito que poden facer, remarcaron fontes do PP, "coas contas doutras formacións". "O PP nunca creou contas falsas porque considera que a efectividade real nas redes materialízase cos voluntarios reais e as súas propias contas", xustificou, pese ao estudo de Twitter que confirma que as contas estaban operadas directamente polo partido.
Xa en xuño, Twitter informou de que suspendera unha rede de 130 contas falsas de Esquerra Republicana por influír "de forma orgánica na conversación" para obter "beneficio político".
Segundo a base de datos achegada pola rede social, as máis de 200 contas suspendidas administrábanse desde diferentes puntos de España, e na súa maioría dedicábanse a criticar ao presidente do Goberno en funcións, Pedro Sánchez, e ao resto de partidos, ao mesmo tempo que enxalzaban o discurso do presidente do PP, Pablo Casado.
Xunto á desconexión das 259 contas do PP en España, Twitter tamén tomou medidas contra redes de miles de contas falsas e China e en Hong Kong -que alimentaban as fortes protestas que duraron varias semanas-, Ecuador, Arabia Saudita, Emiratos Árabes Unidos e Exipto.
