Un xulgado de Madrid emitiu unha orde de detención contra o actor Willy Toledo por non acudir a declarar en dúas ocasións tras a denuncia da Asociación Española de Avogados Cristiáns por suposta vexación dos sentimentos relixiosos, segundo informa esta organización.
A Asociación Española de Avogados Cristiáns denunciou ante a Fiscalía uns comentarios ofensivos, difundidos por Willy Toledo a través de Facebook en xullo de 2017, que a xuízo desta organización vexaban os sentimentos relixiosos.
Tras eludir o actor dúas citacións o xulgado de Instrución número 11 de Madrid ordenou a súa detención e posta a disposición da xustiza para o próximo día 13, concreta a organización denunciante nun comunicado.
Ademais, Avogados Cristiáns anuncia que pedirá ao xuíz que valore a existencia dun delito de odio despois de que o actor xustificase en televisión que durante a Guerra Civil fusilaron a persoas por mor da súa fe e incendiaron igrexas porque "algo farían".
Recorda que "son palabras que dixo en directo durante un cara a cara coa presidenta da asociación no programa Al rojo vivo da Sexta".
No comunicado a presidenta da Asociación Española de Avogados Cristiáns, Polonia Castellanos, defende que "todos somos iguais ante a Lei" e que, xa que logo, Willy Toledo "ten a obrigación de acudir ao Xulgado se o cita un xuíz, aínda que el crea que ten privilexios especiais pola súa posición social".
Tras a declaración de Willy Toledo, o xuíz decidirá sobre a continuación da instrución coas probas que solicite a Fiscalía e Avogados Cristiáns ou se procede a apertura de xuízo oral.
