O Ministerio de Xustiza "está a procesar os datos para a realización da listaxe" de bens inmatriculados pola Igrexa católica e prevese que, unha vez finalizado, se proceda á súa publicación de forma que se garanta o cumprimento da Lei Hipotecaria e a Lei Orgánica de Protección de datos".
Así o asegurou o Goberno nunha resposta escrita dirixida ao deputado do PSOE Antonio Hurtado, quen considera que esa lista "vai ser un punto de partida moi importante" para que se poidan iniciar as reclamacións por parte de particulares e institucións. "Inmatriculáronse bens de dominio público que pertencen á colectividade e son de uso e servizo público", apuntou en declaracións Europa Press.
Unha reforma da Lei Hipotecaria aprobada en 1988 por parte do Goberno de José María Aznar outorgaba a potestade á Igrexa católica de acreditar a propiedade de templos ou lugares de culto.
A xuízo do parlamentario do PSOE, esta modificación permitiu á Igrexa inmatricular bens de dominio público "sen necesidade de acreditar a súa propiedade" xa que se lle deu un perfil de institución publica a unha institución privada que é a Igrexa".
En 2017, o PPdeG votou en contra no pleno do Parlamento galego dunha iniciativa do PSdeG co –apoio do resto da oposición– que reclamaba pedir unha listaxe dos bens inmatriculados a favor da Igrexa católica en Galicia.
RENUNCIA AOS BENS "VOLUNTARIAMENTE". Ante este escenario, Hurtado apuntou cara á posibilidade de que a Igrexa "reconsidere o uso que fixo dese cambio normativo" e "de forma voluntaria renuncie" a estes bens. Segundo explicou, esta é a alternativa á vía xudicial que, segundo vaticinou, "será un conflito longo" pero que "haberá que pór en marcha para recuperar os bens que foron apropiados de forma indebida".
Neste sentido, recordou que xa hai sentenzas do Tribunal Europeo de Dereitos Humanos (TEDH) que avisan de que "ese cambio normativo non está acorde á normativa europea nin á Convención de Dereitos Humanos" e "dan a razón" aos particulares que reclaman ás Igrexas os bens.
Hurtado destacou que o Goberno ao acceder á elaboración e publicación da listaxe "comprométese a facer efectivo un acordo do Congreso", xa que en abril de 2017 aprobouse na Comisión de Xustiza do Congreso unha iniciativa que reclamaba esa lista ao anterior Executivo de Mariano Rajoy.
"Se (o Goberno de Mariano Rajoy) tíñaa, tíñaa no fondo dun caixón", sentenciou o parlamentario do PSOE, que lamentou que o Executivo do PP "se limitase a pedir ao Colexio de Rexistradores da Propiedade unha relación de todas as inmatriculacións".
Así mesmo, fixo fincapé en que o anterior Goberno "nunca se comprometeu a facela pública", polo que agradeceu esa intención do novo Executivo de Pedro Sánchez. "O que coñecemos pode ser que sexa a punta dun iceberg e que sexan máis propiedades das que se poden estimar", augurou.
