Óscar e Alba, a parella que iniciou a peregrinación desde Tui o pasado sábado 27 aproveitando que teñen uns días de vacacións en Semana Santa, sinalan que se atoparon con moi poucos camiñantes. "Sobre todo vimos a persoas que efectúan rutas de sendeirismo", subliñan.
"Estamos moi cansos; necesitamos repor forzas", indicaron á súa chegada ás instalacións xacobeas que xestiona a asociación cultural Amigos do Camiño Portugués a Santiago.
Coa chegada dos primeiros peregrinos o albergue volve recobrar a vida. Desde o pasado día 15, cando se reabriu o centro xacobeo tras permanecer pechado desde o 3 de novembro de 2020 (cando a Xunta de Galicia ordenou o peche perimetral do municipio como medida para a prevención de contagios por covid-19), os hospitaleros esperaran en balde a chegada dalgún camiñante.
Tino Lores, presidente da asociación Amigos do Camiño Portugués a Santiago, indica que a presenza dos primeiros peregrinos no albergue "deunos moita alegría e devólvenos emocións de 1993 (o primeiro Xacobeo da entidade) logo dunha tempada que estaba a resultar moi triste xa que, por culpa da pandemia". Ademais, lamenta que a crise sanitaria botara por terra as previsións de acoller a 120.000 camiñantes durante o presente Xacobeo 2021.