O albergue de peregrinos que a Xunta de Galicia a punto está de abrir na Praza do Berbés, en Vigo, levará o nome de Juan Manuel López-Chavez Meléndez, impulsor do Camiño Portugués e un dos artífices do recoñecemento internacional o Camiño de Santiago. Así o anunciou este luns o vicepresidente primeiro da Xunta de Galicia, Alfonso Rueda, en recoñecemento do traballo que fixo polo Camiño o presidente de honra da Asociación de Amigos dos Pazos, a cal solicitou, apoiada por unha trintena de entidades e personalidades de Vigo, esta homenaxe para López-Chaves.
Non en balde, López-Chavez impulsou o Camiño Portugués, que é hoxe a segunda ruta máis frecuentada polos peregrinos, e recuperou o valor histórico da variante da Costa, o único que pasa por Vigo. O seu incansable labor de investigación e promoción do fenómeno Xacobeo, como destaca a Xunta nun comunicado, foi fundamental para que en 1987 o Camiño de Santiago fose declarado Primeiro Itinerario Cultural Europeo.
Se o Camiño é hoxe un dos tesouros máis apreciados polos galegos, segundo Roda, é grazas ao labor de persoas como López-Chavez.
Rueda confirmou que o novo albergue estará operativo no verán, aínda que a data de apertura concretarase en xuño, xa que a súa posta en funcionamento será "coordinada" coa apertura doutros albergues e coa evolución da demanda. Rueda sinalou que "xa ven moitísimos peregrinos" e algúns "están a empezar a saír desde os diferentes puntos" das rutas xacobeas. De feito, este pasado fin de semana seláronse en Santiago unhas 460 'compostelás'.
Pola súa banda, a delegada territorial do goberno galego, Marta Fernández-Tapias, recalcou que a decisión de pór ao albergue o nome de Juan Manuel López-Chaves é un recoñecemento "máis que merecido".
López-Chaves agradeceu a "honra" de ver o seu nome no primeiro albergue público de peregrinos na cidade olívica e invitou a reflexionar sobre a achega das rutas xacobeas á sociedade actual, que sofre unha pandemia a nivel global. "É un alimento espiritual (...), os peregrinos ven a chegada a Santiago como un futuro esperanzador, e os españois tamén necesitan saber que, logo da pandemia, terán un futuro mellor", proclamou.
