A Federación de Asociacións de Amigos do Camiño de Santiago de España expresou este xoves a súa "preocupación" tras a presentación da denominada Rede Eurovelo 1 e 3, rede ciclista europea que en España se vai a superponer en gran parte sobre o Camiño de Santiago Francés e a Vía da Prata", algo que consideran un "grave erro".
Para a entidade, "a decisión unilateral de realizar o trazado dunha rede ciclista que vai ser moi utilizada" sobre a ruta de peregrinación "constitúe un grave erro, sendo unha decisión que conculca a protección que ten o Camiño de Santiago Francés como Patrimonio da Humanidade pola Unesco", á vez que xerará problemas de "convivencia" entre usuarios, alerta o presidente da Federación Española, Luís Gutiérrez Perrino.
Polo Camiño de Santiago Francés, como no resto dos Camiños de Santiago, recordan, van peregrinos a pé, en bicicleta, cadeira de rodas e dacabalo, fundamentalmente. Co trazado actual, "nos tramos máis complexos hai espazo suficiente para que peregrinos en bicicleta e peregrinos a pé poidan convivir sen demasiados problemas". Con todo, "introducir un gran volume de ciclistas leva un cambio radical no uso do camiño, ademais de aumentar os riscos para os peregrinos máis desfavorecidos, en cadeira de rodas e a pé", explican.
Nun comunicado, a Federación chamou a atención sobre o feito de que a revitalización do Camiño levou a moitas "administracións" a velo "unicamente como un recurso turístico, con obxecto de dinamizalo en busca de beneficios económicos e sen reflexionar sobre o fondo do fenómeno xacobeo, nin preguntarse o porqué da poderosa atracción exercida polo Camiño".
"A utilización de boa parte do Camiño para o uso das Redes Eurovelo 1 e 3 supón contrapór o desenvolvemento dunha forma de turismo saudable e, por suposto, desexable, co alento íntimo, discreto e respectuoso que latexa en cada peregrino xacobeo e, que se se acaba impondo, significará o triunfo da visión turística e economicista sobre un feito sobresaliente do pensamento europeo e un dos sucesos espirituais, relixiosos e culturais máis importantes e arraigados de Occidente", recollen.
Por todo iso, as Asociacións de Amigos do Camiño pediron que se reconsidere o proxecto, á vez que ofreceron a súa colaboración para "crear outras alternativas que faciliten o nobre deporte da bicicleta sen alterar a esencia do Camiño de Santiago".
