A histórica casa das Josefinas, entre a Ronda da Muralla e a rúa Santiago e a do Merlo, reconverterase parcialmente para acoller un albergue de peregrinos, que ofrecerá unhas 40 prazas, segundo explicaron este mércores na congregación relixiosa.
O proxecto da orde das Servas de San José céntrase no edificio que hai anos acolleu un internado de nenas e que tamén serve de fogar ás relixiosas da congregación que residen actualmente en Lugo.
Trátase do edificio máis antigo do complexo coñecido como de Pepas e que non está vinculado agora ao colexio, un dos que ten máis alumnos no centro da capital.
O inmoble no que se situará o albergue data das primeiras décadas do século XX e foi a sede do primeiro colexio da congregación na cidade, ata que cara aos anos 60 se construíu o actual colexio, que forma parte do mesmo complexo de edificacións.
O executivo local aprobou na reunión da xunta de goberno deste mércores o proxecto de rehabilitación parcial das plantas baixa e primeira e o cambio de uso, de escolar a hospedaxe para albergue, que fará posible o proxecto.
Será o primeiro albergue de peregrinos da cidade vinculado a unha orde relixiosa
Segundo o acordo aprobado polo goberno local, a conversión desas dúas plantas suporá un investimento de 70.884 euros e haberá un prazo de 36 meses para a execución das obras previstas.
Desde a congregación sinalouse que a intervención se centrará na primeira e a segunda planta do edificio, nunha serie de instalacións que actualmente están sen uso e que ata hai dous anos prestaban servizo ao colexio, acollendo áreas como a do comedor escolar do centro.
O novo albergue ocupará un emprazamento privilexiado na cidade, xa que está practicamente ao pé da catedral e en pleno Camiño de Santiago. Desde a congregación avanzouse que se ofrecerán ao redor de 40 prazas de aloxamento, pero non se detallou aínda o conxunto de servizos que ofrecerá o albergue. "Unha vez que se confirme a licenza poderanse facer obras e entón será o momento de ver como será o albergue", sinalaron.
Si será, en todo caso, o primeiro albergue de peregrinos da cidade vinculado a unha orde relixiosa. Probablemente sexa o primeiro de toda a diocese dese tipo, apuntaban este mércores no obispado.
O proxecto correrá a cargo das Servas de San José, a orde á que pertence o edificio. Neste momento forman parte da congregación unha decena de relixiosas, todas elas xubiladas xa na actualidade. As relixiosas estiveron durante anos vinculadas ao colexio, pero neste momento están xa retiradas e, xa que logo, só colaboran co colexio nalgunhas actividades de voluntariado, segundo destaca a representante da orde en Lugo.
De momento queda un longo camiño, polas obras a executar, ata abrir o albergue.
