A catedral de Santiago de Compostela estreou esta tarde unha nova iluminación interior, coa instalación de 700 luminarias, que mellora nun 61% a eficiencia enerxética respecto da anterior e evita a emisión á atmosfera de 6,7 toneladas de CO2 ao ano.
Así se puxo de manifesto durante o acto para estrear esta iluminación, que conta cunha potencia total de 15,8 quilowatts, desenvolvida pola enerxética Iberdrola e que coincide coa celebración do dobre ano Xacobeo 2021-2022 cunha "intensidade renovada" desde "o seu epicentro máis emblemático", segundo asegurou o presidente da Xunta, Alberto Núñez Feijóo.
Á inauguración acudiron tamén o presidente de Iberdrola, Ignacio Galán; o arcebispo de Santiago, Julián Barrio Barrio; e o alcalde compostelán, Xosé Sánchez Bugallo.
Galán destacou que a iluminación da catedral é o resultado de fundir "arte e cultura con innovación", con elementos singulares como as 36 novas lámpadas, inspiradas nas antigas lámpadas votivas da catedral e deseñadas en exclusiva para este proxecto.
Estas lámpadas suspendidas na nave central e os transeptos, recuperan a iluminación de séculos en que o templo se iluminaba con velas e están dotadas coa última tecnoloxía en iluminación, xa que dispoñen de 12 emisores LED cada unha e aliméntanse directamente desde os propios cables que as ancoran ao teito e mantéñenas suspendidas.
Por iso, Feijóo sinalou que este proxecto se basea en tres preceptos clave como son "o compromiso pola sustentabilidade, respecto pola relixiosidade e desenvolvemento cultural", cun sistema que desenvolve todo o potencial estético do templo "sen substituír a luz natural".
Engadiu que este strong "xacobeo bianual" é unha "chamada luminosa" que Galicia dirixe a todos os pobos do mundo para que "acudan a Compostela" porque o ano santo é a "superación progresiva da pandemia e o momento para deixar atrás a etapa máis difícil do camiño máis importante: o da saúde".
Nese sentido, subliñou que as autoridades van "extremar aínda máis as precaucións" para garantir a seguridade e saúde das persoas.
Núñez Feijóo puxo en valor os 24 millóns de euros investidos na restauración da catedral compostelá nun "dos esforzos de conservación máis grandes da historia recente do noso país".
Un esforzo que, segundo apuntou, terá continuidade no plan de catedrais 2021-2027 para conservar as cinco grandes catedrais da comunidade, a antiga catedral de San Martiño de Mondoñedo e as dúas concatedrais de Vigo e Ferrol.
Pola súa banda, Galán dixo que a empresa realizou estas obras "coa mesma ilusión e compromiso" con Galicia e "impulsando a transición enerxética, o desenvolvemento industrial e a xeración de emprego sostible e de calidade", cun impacto económico que supera os 400 millóns de euros ao ano entre investimentos, compras, salarios e contribución fiscal.
Ademais, tivo unha mención especial á enerxía eólica mariña flotante cun "investimento pioneiro" nas costas galegas, que prevé facer de Galicia un "referente mundial" nesta tecnoloxía, augurou.
No acto tamén interveu o arquitecto responsable do proxecto de iluminación, Ignacio Valero, e o arcebispo de Santiago, quen se referiu ao novo sistema de luces "como a culminación dun longo e profundo proceso da catedral compostelá".
O alcalde compostelán de Santiago proclamou que "Galicia brilla hoxe máis que nunca e a catedral de Santiago tamén".
