A Secretaría Xeral da Emigración publicou este mércores a listaxe das persoas admitidas no programa de lecer Conecta co Xacobeo co que "97 galegos do exterior de España e Europa de entre 18 e 64 anos" percorrerán o Camiño de Santiago entre o 18 e o 26 de setembro.
Os participantes instalaranse nas residencias de tempo libre de Panxón e de Carballiño, realizando os primeiros 100 quilómetros do Camiño Portugués pola Costa, e os segundos 100 quilómetros pola Vía da Prata. Deste xeito, desenvolverán de mañá durante os tres primeiros días de estancia tres tramos do camiño pola mañá, e pola tarde regresarán ás residencias para realizar actividades de lecer lúdico-culturais.
Os participantes desenvolverán polas mañás as diferentes etapas do camiño e polas tardes regresarán ás residencias para realizar actividades de lecer lúdico-culturais
O cuarto día visitarán a Ribeira Sacra, e as tres últimas xornadas dedicaranas, do mesmo xeito que as primeiras, a finalizar as etapas ata chegar a Compostela. Esta iniciativa, que se desenvolve por primeira vez, ten como obxectivo promover os lazos con Galicia e coa súa cultura a través do Camiño de Santiago das persoas vinculadas ás entidades galegas que existen tanto no resto de comunidades autónomas de España como en países europeos.
"Deste xeito, non só se fomenta a súa participación no actual Ano Santo, senón tamén se lle dá un impulso ás entidades e centros galegos, así como aos seus asociados, que sufriron numerosos peches e limitacións por mor da pandemia durante os últimos meses", sinala o secretario xeral da Emigración, Antonio Rodríguez Miranda.
Deste xeito, a secretaría de Emigración reinicia os programas de achegamento a Galicia dos galegos do exterior, centrándose na participación do continente europeo ante a dificultade de aplicación do control das medidas sanitarias marcadas pola pandemia da Covid-19 noutros continentes.
